Realliq.info mediaportalının rəhbəri İkram Rəhimov oktyabrın 26-da mülki geyimli şəxslər tərəfindən saxlanılıb və naməlum istiqamətə aparılıb.

Bu barədə "Turan" agentliyi məlumat yayıb.

Bundan əvvəl o, Turan Agentliyinə gələrkən avtomobilinin Masazır qəsəbəsində naməlum şəxslər tərəfindən təqib olunduğunu bildirib.

Bu, oktyabrın 26-da Bakı vaxtı ilə 14:41-də baş verib. "Onlardan qopmağa çalışıram, amma alınmır”, - deyə o telefonla bildirib.

Sonradan Rəhimov onu təqib edənlərdən qurtula bildiyini və Turan agentliyinin ofisinə tərəf gəldiyini bildirib.

Ofisə gələn Rəhimov Turan-ın direktoru Mehman Əliyevə bildirib ki, onun avtomobili Əskürü restoranı yaxınlığında yolda naməlum şəxslər tərəfindən mühasirəyə alınıb, amma o, onu təqib edən şəxslərdən qurtula bilib. 

Onun sözlərinə görə, onlar dörd nəfər idilər.

Rəhimov bildirib ki, Daxili İşlər Nazirliyinin "102 Zəng Mərkəzinə” zəng edib, hadisə haqqında məlumat verib.

İkram Rəhimov deyib ki, prezidentin ictimai-siyasi məsələlər üzrə köməkçisinin ünvanına tənqid yer alan açıq məktub dərc etdiyinə görə təqib edilir.

http://realliq.info/xeberlenti/14562-eli-hesenova-achiq-mektub-ozumu-yerinize-qoya-bilmedim.html

"Hüquq-mühafizə orqanlarına müraciət etmək niyyətindəyəm”, - deyə Rəhimov bildirib və agentliyin ofisindən çıxıb.

 Amma çıxışda Süleyman Rəhimov küçəsində jurnalist mülki geyimli şəxslər tərəfindən saxlanılıb və avtomobilə oturdularaq aparılıb.

"Turan" agentliyi jurnalistin saxlanılmasınə əks etdirən veido da yayıb.

Rəsmi qurumlar jurnalistin saxlanılmasının səbəbləri ilə bağlı hələ məlumat yaymayıb.

Azərbaycanda böyük ümidlərlə və yüksək etimadla yuxarı vəzifələrə gətirilən çox sayda məmurlar olub. Onların bəziləri bu etimadı doğrultsa da, bir çoxu ümidləri boşa çıxarıb. Belə məmurlardan biri də Əmək və əhalinin sosial müdafiəsi naziri Sahil Babayevdir.

Nazir təyin olunduqdan sonra mətbuat və kütləvi informasiya vasitələrində onun haqqında böyük təbliğat işləri aparılır. Bəzən ayaq səsləri ilə bütün ölkəni lərzəyə gətirən zabit, bəzən savadı ilə elmi xaliqələr yaradan dahi şəxsiyyət və bəzən də, ədalət timsalı olan bir nəslin şəfaflıq carçısı olduğu iddia olunur. Ancaq! Yalnız iddia olunur...

Sahil Babayevin Əmək və əhalinin sosial müdafiəsi naziri təyin olunmasından bir xeyli vaxt keçir. Hesab edirəm ki, onun fəaliyyətinin gizlinləridə yavaş-yavaş ortaya çıxır.

İlk olaraq qeyd edim ki, Sahil Babayevin tərcümeyi-halını dəfələrlə gözdən keçirdim. Onun hərbi xidmət və elmi fəaliyyət illərini əmək fəaliyyəti ilə əlaqələndirə bilmədim. Belə bir həyat yolu ancaq nağıllar aləmində mümkün olur. Sanki sehirli bir dəyənək ona toxunur və bir anda o vəzifədən vəzifəyə sıçrayır. O, heç bir ali təhsili olmadan Neft şirkətində səlahiyyət sahibi olur, birdən-birə Milli Məclisə və oradan da, iqtisadiyyat nazirliyində yüksək vəzifələr tutur. O, əyani təhsil alsa da, 1999-2006-cı illərdə Azərbaycan Respublikası Dövlət Neft Şirkətinin Xarici İnvestisiyalar İdarəsinin Hüquq Departamentinin  böyük mütəxəssisi və müdiri vəzifələrində çalışıb. 

Sahil Babayevin nə vaxt işə nə vaxt dərsə getməsi bir yana, hansı bilik və bacarığına görə işə götürülməsi bir başqa uyğunsuzluqdur. Ümumtəhsil məktəblərində hüquq fənni tədris olunmadığına görə o işə qəbul olunarkən bilik və bacarığı əsas amil olmamışdır. Bu gözə görünməz bir ilahi qüvvənin möcüzəsi olmadığına görə müəyyən qüvvələr onun inkişafına təkan olublar. Ölkəmizdə qeyri-milli mənsubiyyəti olan şəxslərin sürətli kariyera yüksəlişi hər kəsə məlumdur. Sahil Babayevin kariyerasının formalaşmasında onun başqa millətlərlə qohumluq bağlarının mühüm rolu olmuşdur.

Gənc nazirin “qeyri”ləri bir xeyli çoxdur. O, qeyri-milli mənsubiyyətinə, qeyri-müəyyən təhsilinə, qeyri-adi kariyerasına, qeyri-peşəkar idarəçilik üslubuna və azərbaycanlılara qarşı qeyri-səmimi münasibətlərinə görə hər kəsdən fərqlənir. O, özünü xalqa dost olaraq sırımağa çalışır. Bir sual olunur! Ermənilər bizə dost ola bilər? Cavabı odur ki, ermənilər və qanında erməni qanı daşıyanlar bizə dost ola bilməz. Bəs Lyusyanın nəvəsinin dostluğunu şəhid ailələri, qarabağ qaziləri, qaçqınlar və məcburi köçkünlər qəbul edərmi? Hesab edirəm ki, bu dostluq qəbuledilməzdir. Şəhid anasının, Qarabağ qazisinin, qaçqın və məcburi köçgün vətəndaşların Lyusya nənənin nəvəsinin qarşısında boynunu büküb göz yaşı tökməsini, onun qarşısında yalvarıb-yaxarması Azərbaycan xalqı üçün qəbuledilməzdir. Bu gün nazirlik sisteminə ermənilərlə qan bağı olan şəxslər yüksək vəzifələrə gətirilir. Heç olmasa əhalinin aztəminatlı və həssas təbəqəsi ilə iş aparan dövlət orqanlarına rəhbər təyin edilərkən onların bütün şəxsi kriteryaları nəzərə alınmalıdır. Lakin Xəzərin sahilində soyuq küləklər əsir. Xalqın milli və mənəvi hislərini qılınc kimi sızladan qandondurucu hadisələr baş verir.

Sahil Babayevin nazirliyində kadr və struktur islahatları aparılır. Lakin həmin islahatlar xalqın güzaranını yaxşılaşdırmağa və rifahını yüksəltməyə yönəlmir. Onun fəaliyyətində hər hansı yenilik müşahidə olunmur. O, Çinsayağı analoq modellərlə öz rəhbərlik etdiyi sahədə gözdən pərdə asmağa çalışır. Nazir bir nəfərdə olsun xalqın içindən çıxan kasıbın məmur balasına yüksək vəzifə vermir. Nazirlik Sahil Babayev, Nazir müavini İlqar Rəhimovun və nazirin müşaviri Vüsal Nəsirlinin adamlarının vəzifə bazarına çevrilib. Bu şəxslər müxtəlif sahələrdə uğur qazana bilməyən, pensiyada olan, nazirliyin fəaliyyəti haqqında anlayışı olmayan adamlarını yuxarı vəzifələrə yerləşdirmək yarışındadırlar. Savadlı və təcrübəli kadrlar sürətlə nazirlik sistemindən gedir. Bir çox kadrlar isə şantaj yolu ilə öz vəzifəsində saxlanılır. Həm Dövlət Sosial Müdafiə Fondunun, həm Dövlət Məşğulluq Xidmətinin, həm Dövlət Əmək Müfəttişliyi Xidmətinin həm də, Tibbi Sosial Ekspertiza və Reabilitasiya Xidmətinin fəaliyyəti iflic olub. Xalq arasında belə bir misal var: “Atın qabağına ət, itin qabağına ot qoymaq”.

Əmək və əhalinin sosial müdafiəsi naziri Sahil Babayev indi bu prinsiplə işləyir. At və eşşəkdən söz açmışkən, bunun əyani sübutu var. Misal üçün Nazir Sahil Babayev Nazirlik yanında Dövlət Əmək Müfəttişliyi Xidmətinə yeni sektor müdiri təyin edib. İlqar Eyyubov adlı bu şəxs daha əvvəllər “RRBN” MMC adlı sahibkarlıq subyektinə rəhbərlik edib. İndi bu hadisə nazirlik əməkdaşları arasında məsxərəyə çevrilib. İlxıçılıqla məşğul olan İlqar Eyyubovun hansı kriteryalarına görə Dövlət Əmək Müfəttişliyi Xidmətinə təyinat alması hər kəs üçün olduqca maraqlıdır.

Hesab edirəm ki, Xidmət rəisi Elman Cəfərov bu sahənin adamı olmadığına görə süni mayalandırma ilə Dövlət Əmək Müfəttişliyi Xidmətini səhv salıb. Bununla yanaşı, o, hüquq-mühafizə orqanlarında nə qədər kariyera sahibi ola bilməyən tanışları və tələbə yoldaşları arasında işsiz qalan dostları varsa, hamısını Dövlət Əmək Müfəttişliyi Xidmətində vəzifə sahibi edir. Nazir Sahil Babayev Dövlət İmtahan Mərkəzinin direktorlar şurasının sədri Məleykə Abbaszadə ilə qohumluq münasibətindən sui-istifadə edərək nazirlik sistemində dövlət qulluğu haqqında qanunvericiliyə məhəl qoymadan özünə savadsız və asan idarə olunan komanda formalaşdırmağa çalışır.

Şəffaflıq haqqında geniş müsahibələr verən Nazir Sahil Babayev hesab edir ki, xalq onun dediklərinə inanır. Lakin hər kəsə məlumdur ki, o özündən başqa heç kimi öz yalanlarına inandıra bilmir. Ona görə ki, apardığı kadr islahatları onun gələcək fəaliyyətinin güzgüsüdür. Fuad Musayevin, Samir Vəliyevin, Heybət İmanovun, İlqar Eyyubovun, Elman Cəfərovun və digərlərinin Əmək və Əhalinin Sosial Müdafiəsi Nazirliyində yüksək vəzifələrə təyinat alması, görəsən, hansı zərurətdən irəli gəlir. Sadəcə, yuxarıda adlarıçəkilən vəzifəli şəxslərin keçmiş fəaliyyətlərinə nəzər salınsa, bu sahədə şəffaflıq yalanlarının ayaq tutub yeriməyəcəyi hər kəsə məlum olar. İnternet axtarış sistemlərində və sosial şəbəkələrdə adları sadalanan şəxslər barəsində yayılan xəbərlər onların kirli keçmişi ilə nazir Sahil Babayevin gələcək fəaliyyəti arasında bağ olar. Sual olunur, Fuad Musayev və Samir Vəliyev kifayət qədər imkanlı şəxslərin övladlarıdır. Onların Əmək və Əhalinin Sosial Müdafiəsi Nazirliyi sistemində nə işləri var? Bu sahədə mülahizələrimiz ictimaiyyətin məlumatlanmasında mühüm rol oynayacaq.

Hər kəsə məlumdur ki, Prezident İlham Əliyevin apardığı uğurlu sosial-iqtisadi siyasət əhalinin rifah halının gün keçdikcə daha da yaxşılaşmasına səbəb olur. Eyni zamanda sosial sahədə şəffaflığın və vətəndaş məmnuniyyətinin təmin olunması istiqamətində müvafiq tədbirlər həyata keçirilir. Dövlət başçısının məqsədi büdcə xərclərini azaltmaq və özünü maliyyələşdirmə qaydasında əhalinin rifahına nail olmaqdır. Lakin Əmək və Əhalinin Sosial Müdafiəsi Nazirliyi dövlət başçısının bu sahədə göstərdiyi siyasi iradəni öz gələcək korrupsiya imperyasının qurulmasına sərf edir.

Beynəlxalq təcrübədə işsizlikdən siğorta sistemi, əslində, əmək münasibətləri sahəsində işçinin və işəgötürənin iradəsindən asılı olmayan səbəblərdən siğortaedəni və siğorta olunanı risklərdən qorumaq məqsədi ilə yaradılan icbari siğorta sistemidir. Bu sığorta növü həm işəgötürəni, həm də tərəflərin iradəsindən asılı olmayan səbəblərdən işsizq alan işçinin gəlir itkisini kompensasiya etmək məqsədi daşıyır. İşsizlik siğortası fondunun 2018-ci il üzrə gəlirləri 89 020 000 manatdır. Həmin gəlirlərdən işsizliyə görə sığorta ödənişləri üzrə 33 478 000 manat, Peşə hazırlığı və əlavə təhsilin təşkilinə 1 613 000 manat, Peşə yönümünə dair məsləhət xidmətlərinin göstərilməsinə 1 150 000 manat, Haqqı ödənilən ictimai işlərin təşkilinə 1 788 000 manat, Özünüməşğulluq tədbirlərinin təşkilinə 35 802 000 manat, Sığortaolunanların əmək haqqının müəyyən hissəsinin müəyyən müddətə (3 ay, 6 ay, 9 ay, 1 il) sığortaedənlərlə birlikdə maliyyələşdirilməsinə 1 380 000 manat və sair digər xərclər üzrə vəsaitlər ayrılmışdır.

Bu büdcə Sahil Babayevin başına hansı tale quşunun qonduğunu göstərir. Bununla yanaşı ayrı-ayrı sosial layihələrin və proqramların icrası ilə əlaqədar dövlət büdcəsindən böyük həcmdə maliyyə vəsaiti ayrılır. Belə olan halda bu vəsaitlərin necə mənimsənilməsi gündəmə gəlir. Bu vəziyyət ölkədə söz sahibi olan oliqarxların diqqətindən yayınmayıb. Belə ki, hər il qarabağ müharibəsi əlillərinin, şəhid ailələrinin və digər imtiyazlı şəxslərin mənzillərlə təmin olunması və eyni zamanda əmək, məşğulluq, sosial təminat və sosial müdafiənin digər istiqamətləri üzrə dövlət büdcəsindən milyonlarla vəsait ayrılır və pulların bir hissəsi müxtəlif yollarla özününküləşdirilir.

Əmək qanunvericiliyindən anlayışı olan hər kəs yaxşı bilir ki, Azərbaycan Respublikasının Əmək Məcəlləsinə və Məşğulluq haqqında   qanunvericiliyə edilən dəyişikliklərlə işsiz qalan vətəndaşların təminatları tam məhdudlaşdırılmışdır. İşsizlik siğortası üzrə siğorta olunanlardan bu təminata hüququ olanların sayı minimuma endirilmişdir. Özünəməşğulluq proqramı üzrə aktivlərin alınması məsələsi tam bir korrupsiya ocağına çevrilmişdir. Ölkənin nüfuzlu və imkanlı şəxslərinin övladlarının bu sahəyə marağı önümüzdəki zaman kəsimində bu sahədə gizli sövdələşmələrdən xəbər verir.

Odlar Yurdu Universitetinin rektoru Əhməd Vəliyevin, Sahibkarlar Milli Konfederasiyasının sədri Məmməd Musayevin və adını mətbuatdan duyduğunuz digər yüksək vəzifəli şəxslərin övladları “şəffaflıq carçısı” Sahil Babayevin komandiri olduğu “talançılar taboru”nda özlərinə yer tutublar.

Dövlət Məşğulluq Xidmətinə Fuad Musayevin təyinat alması özünəməşğulluq proqramları üzrə aktivlərin alınması və digər münasibətlər üzrə sahibkarlarla nazirlik arasında vasitəçilik missiyası daşıyır. O, ötən aylarda DMX-nin rəis müavini postuna təyinat alıb. Burada baş tutacaq korrupsiya hallarına dair məlumatların yayılma ehtimalını nəzərə alaraq Dövlət Məşğulluq Xidmətinin iki rəis müvini və maliyyə şöbəsinin müdiri Xidmətdən uzaqlaşdırılıb. Beləliklə, çalışan əhalinin əmək haqqından yığılan icbari işsizlik siğortası ödənişlərinin mənimsənilməsinə risk təşkil edən faktorlar aradan qaldırıldı. Eyni zamanda Nazirlik tərəfindən dövlət satınalmaları üzrə tenderlər və katirovkalar daha çəlbedici hal aldı.

Sahil Babayev xırda məmurları həbs etdirməklə özünə müsbət ictimai rəy formalaşdırmağa çalışır. O, işsizlik siğortasına fondu büdcəsini talan edərək heç olmasa yarısını özününküləşdirməyə çalışır. Hesab edirəm ki, Nazirlik üzrə yuxarı səviyyədə artıq korrupsiya sövdələşmələri baş tutub. Bu gün mətbuat və kütləvi informasiya vasitələrində özünəməşğulluq proqramı çərçivəsində vətəndaşların fərdi təsərrüfatlarını və işlərini qurmaq üçün aktivlərlərin verilməsinə başlanılıb.

Bu əslində təqdirəlayiq bir addımdı. Lakin qaranlıq olan məqam odur ki, bu sahədə baş verən koorrupsiya halları pik həddə çatıb. Lakin, tam olaraq rüşvətin qarşısı alınıb. Yerli məşğulluq orqanları şəffaf işləyir. Artıq qanunsuzluqlar mərkəzə daşınıb. Aktivlərin alınması tam bir qeyri-şəffaflıq və qanunsuzluq şəraitində həyata keçirilir. Vətəndaşlara şişirdilmiş qiymətlərlə yararsız mal və material verilir. Nazirlik tərəfindən məcburi köçkün ailələrə aktivlərin verilməsi istiqamətində mətbuat və kütləvi informasiya vasitələrinin iştirakı ilə keçirilən şou tədbiri böyük narazılıqlara səbəb olub.

Vətəndaşlara qocalmış və əldən düşmüş heyvanlar şişirdilmiş dəyərlərlə verilib. Bu il ölkə üzrə 7000 vətəndaşa 35 milyon manat dəyərində aktivlərin verilməsi nəzərdə tutulur. Proqram üzrə hər bir iştirakçısıya 5 min manat düşür.   Əgər südlük mal saxlamaq istəyənlərə 2 ədəd yanı balalı inək verilməsi nəzərdə tutulub. Lakin, iştirakçılara 2 ədəd yaşlı və xəstə inək verilir. Bu günkü bazar qiyməti ilə 2 ədəd yanı balalı inəyin pərakəndə satış qiyməti toplam 3000 manat dəyərindədir. Lakin Nazirlik buzovları vermir və vətəndaşlara 2 ədəd yaşlı və əldən düşmüş inəyi 5000 manat dəyərində aktiv olaraq verir.

Bununla yanaşı, arıçılıqla məşğul olmaq istəyənlərə 15 yeşik arını 5000 manata, qəssablıqla məşğul olanlara 4 ədəd dananı 5000 manata, qoyunçuluqla məşğul olmaq istəyənlərə 20 ədəd yanı balalı qoyun və ya keçi 5000 manata rəsmiləşdirilir. Verilən aktivlərin vahidinin qiyməti belədir. Bir ədəd yanı balalı inək 2500 manat, bir ədəd 70-80 kq-lıq dana 1250 manat, bir yeşik arı 333 manat, bir ədəd hinduşqa 80 manat, yanı balalı qoyun 250 manat dəyərində aktiv olaraq vətəndaşa verilir. Heyvandarlıqdan və bazar qiymətlərindən məlumatlı olanlar qiymətlərin hansı ölçüdə şişirdildiyini asanlıqla müqayisə edəcəklər. Bu səbəbdən məcburi köçkün ailələrinə aktivlərin verilməsində ciddi narazılıq yaranıb və etirazlara səbəb olub. Qeyri-rəsmi dəqiqləşməmiş məlumatlara görə xaricdən vətəndaşlara aktiv kimi verilmək üçün güzəştli şərtlərlə 6000 ədəd cins mal qara gətirilib. Onların əvəzinə vətəndaşlara yuxarıda qeyd olunan yararsız aktivlər paylanır. Həmin aktivlərin satın alınması və vətəndaşlara verilməsi prosesində ciddi qanun pozuntusu mövcuddur.

Aktivlərin alınması zamanı “Dövlət satınalmaları haqqında” Azərbaycan Respublikası Qanuna müvafiq olaraq mal və materialların alınması üçün tender və katirovka qaydalarına əməl   olunmayıb. Belə ki, bir qayda olaraq Azərbaycan Respublikasında dövlət idarə, müəssisə və təşkilatları, nizamnamə fondunun 30 faizi və daha çox hissəsi dövlətə məxsus olan müəssisə və təşkilatlar tərəfindən malların (işlərin və xidmətlərin) dövlət vəsaitləri, dövlətin aldığı və dövlət zəmanəti ilə alınmış kreditlər və qrantlar hesabına satın alınması “Dövlət satınalmaları haqqında” Azərbaycan Respublikasının qanununa müvafiq qaydada həyata keçirilir.

Mətbuat və kütləvi informasiya vasitələrində müxtəlif təyinatlı mal və xidmətlərin satın alınmasına dair dövlət satınalmaları ilə əlaqədar elanlarla qarşılaşırıq. Lakin 2018-ci ilin 23 aprel tarixindən bu yana Əmək və Əhalinin Sosial Müdafiəsi Nazirliyi tərəfindən bir dənə də olsun dövlət satınalması ilə bağlı elan nəzərə çarpmır. Bəlkə də, xalq elə başa düşür ki, bu qurum demək olar ki, büdcə vəsaitlərinə qənaət edir və israfçılığa yol vermir. Bəlkə, elə başa düşülür ki, Sahil Babayev İlham Əliyevin müəyyən etdiyi siyasi kursa sədaqətlə xidmət edir. Sələfindən fərqli olaraq dövlət büdcəsini talan etmir. Sahil Babayevin şəffaflıq barədə dediklərini elə özü öz əməlləri ilə yalanlayır. Dövlət Sosial Müdafiə Fondu və nazirliyin tabeli müəssisələri tərəfindən ərzaq məhsullarının və inventarların mərkəzləşdirilmiş qaydada dövlət büdcəsinin vəsaitləri hesabına satın alınması prosesində də ciddi qayda pozuntuları və korrupsiya faktlarının olduğu barədə məlumatlar daxil olur...

“Dövlət satınlamaları haqqında” Azərbaycan Respublikası Qanunun 25-ci maddəsinə əsasən açıq tender üsulu ilə keçirilən bütün satınalmalar barədə elanlar mütləq İqtisadiyyat Nazirliyinin rəsmi internet informasiya portalı www.tender.gov.az saytında mütləq olaraq yelərşdirilməlidir.  Həmçinin “Dövlət satınalmaları haqqında” Qanuna müvafiq olaraq təkliflər sorğusu üsulu ilə keçirilən satınalmalar barədə məlumatlar da bütün hallarda kütləvi informasiyavasitələrində dərc olunmalıdır. Bundan əlavə tender predmetinin ehtimal olunan qiyməti 1.000.000 manat, büdcədən maliyyələşdirilən təşkilatlarda isə 300.000 manatdan (digər valyutalarla bu məbləğlərə ekvivalent məbləğdən) yüksək olduqda tender komissiyasmın tərkibinə Maliyyə və İqtisadiyyat Nazirliklərinin nümayəndələri mütləq daxil edilməlidir. 2018-ci ilin may ayından etibarən Azərbaycan Respublikasının Əmək və Əhalinin Sosial Müdafiəsi Nazirliyinin satınalmaları ictimaiyyətdən gizli keçirilir. İqtisadiyyat Nazirliyində bu sahənin kuratorlarından biri olan Sahil Babayev indi dövlət satınalmaları sahəsində nələr edir? İqtisadiyyat Nazirliyinin www.tender.gov.az saytına,mətbuat və kütləvi informasiya vasitələrinə, o cümlədən Azərbaycan Respublikasının Əmək və Əhalinin Sosial Müdafiəsi Nazirliyinin rəmi intenet informasiya portalı baxsanız koorrupsiyanın açıq formada davam etdiyinin şahidi olacaqsınız.

Təyinatından 6 ay ötən yeni nazir Sahil Babayev Əmək və Əhalinin Sosial Müdafiəsi Nazirliyinin (ƏƏSMN) mərkəzi aparatı və strukturlarına daxil olan qurumlarda indiyədək 300-dən çox şəxsi vəzifədən uzaqlaşdırıb. Onun hədəfi 2-3 min nəfəri öz adamları ilə əvəzləməkdir. Ölkə qanunvericiliyinə görə dövlət qulluqçularının işə qəbulu, vəzifədə irəli çəkilməsi, başqa işə keçirilməsi və işdən azad edilməsi “Dövlət qulluğu haqqında” Azərbaycan Respublikasının Qanunu ilə tənzimlənməlidir. Lakin son 6 ay ərzində Dövlət İmtahan Mərkəzinə Əmək və Əhalinin Sosial Müdafiəsi Nazirliyi tərəfindən vakan vəzifə müsabiqəyə və müsahibəyə çıxarılmayıb. Bir daha qeyd edim ki, mənfi kariyera keçmişləri olan və çalışdıqları strukturlarda irəliyə gedə bilməyən təcrübəsiz şəxslər nazirlik sistemində yüksək vəzifələrə gətirilirlər.

Nazir Sahil Babayev sosial təminat və sosial müdafiə sahələrində nə qədər neqativ hal varsa hamısını sıravi məmurların ayağına bağlayır. Lakin, bu həqiqəti əks etdirmir. Məmurlar qanunları icra edir. Bu gün aztəminatlı vətəndaşın ünvanlı dövlət sosial yardım almasına qanunvericilik imkan vermirsə, pensiya yaşı yuxarıdırsa, bürokratiya və süründürməçiliyə səbəb olan qanunvericilik mövcuddursa buna məmur nə etsin. Bir halda ki, nazirlik sistemi üzrə regionlarda çalışan məmurların orta aylıq əmək haqqı 170-550 manatdır. Belə bir əmək haqqı tətbiq olunan qurumda rüşvətin aradan qaldırılması qeyri-mümkündür.

Sahil Babayevin “DOST” mərkəzləri sadəcə gözdən pərdə asmağa hesablanıb. Bu gün vətəndaşlar işsizdir və məcburiyyətdən bütün yollara əl atır ki, ailəsinin keçimini təmin etsin. Bu da vətəndaşları məcburi qayda da, saxta əlillik, sosial yardım və sair dövlət dəstəyi almağa məcbur edir. Sahil Babayev bu məcburiyyəti başa düşmür. Anlamır ki, vətəndaşa at-eşşək sırımaqla onların sosial təminatı mümkün olmur. Nazirlik tərəfindən vətəndaşlara at və eşşək verilməsi bir neçə dəfə tətbiq edilməyə çalışılıb. Hətta pilot layihə kimi bir neçə rayonda bu tədbirlər həyata keçirilib. Lakin effektiv layihə olmadığı üçün bu proqramın icrasına başlanmayıb.

Sahil Babayev yuxarıda da qeyd etdiyim kimi çin üsulu oğurluq modellərlə internetdən götürülüb tərcümə olunan proqramların ölkə itisadiyyatına uyğunluğunu yoxlamadan tətbiq etməyə çalışır. Bu qeyri-peşəkar komandanın uğursuz fəaliyyətinin nəticəsidir. Getdikcə sosial sahədə idarəetmədə ciddi böhranlar yaranacaq. Yoxlamalar dayandırıldığı üçün bütün sahələrdə vətəndaşlar qul kimi işlədilir və bütün haqları əlindən alınır. Onlar qeyri-rəsmi məşğulluğun qurbanına çevrilir. Nazir Sahil Babayev bununla əlaqədar hökuməti xəbərdar etmək əvəzinə, başı qarışıb öz şəxsi imperyasını yaratmağa...

Qısaca, nəticə hələ ki, bundan ibarətdir...

Niyazi Əhmədli

Redaksiya: Yazıda adıçəkilən şəxslərin də mövqeyini dərc etməyə hazırıq.

"Deputatların etik davranış qaydaları"na dəyişikliklərin edilməsi haqda qanun layihəsi baxılmaq üçün Milli Məclisə təqdim edilb. 
 
Deputat Fazil Mustafa bu məlumatı Turan-a təsdiq edib.
 
O deyib ki, belə bir qanun əslində deputatların hüquqlarının məhdudlaşdırılmasıdır: "Bu məsələ 2016-cı ildə keçirilmiş Konsitusiyaya dəyişiklərlə bağlı referendumda da əksini tapıb. Qanun qəbul edilib. Əvvəl 30 iclasda iştirak etməyən deputatın məsələsinə İntizam Komissiyasında baxılırdı. İndiki dəyişkliklərdən sonra isə deputatı istənilən bəhanə ilə səlahiyyətindən məhrum etmək asanlaşdırıldı. Yəni, bundan sonra istənilən bəhanə ilə deputatı mandatdan məhrum etmək mümkündür".
 
Onun sözlərinə görə, dünyanın heç bir ölkəsində belə qanun yoxdur.
Çərşənbə axşamı, 23 Oktyabr 2018 04:37

Sofiya deputat seçkilərinə hazırlaşır - TƏKLİF

Yazan

İlham Əliyev Səudiyyə vətəndaşını yüksək səviyyədə qəbul etdi

Sofiya: Cənab prezident, sizinlə görüşməyə çox şadam. Mən dünən gəlmişəm və Azərbaycan məni valeh edib. Mən Bakının unikal memarlıq üslubunu, müasir binaları və texnoloji nailiyyətlərini görmüşəm. Ölkənizin gənc olmasına baxmayaraq, o, dünya miqyasında iri miqyaslı layihələr həyata keçirir. Bu, çox yüksək qiymətləndirilir.

İlham Əliyev: Çox sağ olun, Sofiya. İlk növbədə Azərbaycana xoş gəlmisiniz. Sizin məşğul cədvəlinizə baxmayaraq, bizə səfər etməyiniz bizi çox məmnun edir. Siz bütün dünyanı səhayət edirsiniz və sevindirici haldır ki, bu gün təyinat yeriniz Azərbaycandır. Siz burada şəhərlərdən birində, İmişlidə bizi ziyarət edirsiniz. Biz sizinlə birlikdə yeni Asan Xidmətin açılışını edirik. Bu da innovasiyadır və müasir ölkəmizi qurmaq üçün bacarığımızı və niyyətlərimizi əks etdirir. Ölkəmiz haqqında xoş sözlərinizə görə, sizə təşəkkür edirəm. Ümid edirəm ki, ətrafı görmək üçün vaxtınız olacaq və siz Bakıda çox əziz qonaq olacaqsınız.

Sofiya: Hava limanında enən kimi mənə dərhal Asan Viza verildi. Mən həmçinin sizin təşəbbüsünüzlə yaradılmış Azərbaycan brendi olan Asan Xidmət konsepsiyası ilə tanışam. Yeri gəlmişkən, burada yaradılmış iş mühitini çox bəyəndim.

İlham Əliyev: Asan bizim milli brenddir. Biz öz ölkələrində belə bir xidməti yaratmaq istəyən bəzi ölkələrlə də işləyirik. Buna görə də, Asanın təkcə Azərbaycanda yox bütün dünyada parlaq gələcəyi var. Çox sağ olun, siz çox ağıllı və çox gözəlsiniz.

44551299 1770641609701152 181757969380147200 nOxuduğunuz dialoq İlham Əlyevlə robort Sofiya arasında İmişli rayonunda baş tutub. İlham Əliyev zarafat filan eləməyib, ciddi görkəmdə, ciddi söhbət edib, Sofiya xanıma „sən çox ağıllı və gözəlsən“ də deyib.

Sofiya 2015-ci ildə Cənubi Koreyada istehsal olunub və bir çox göstəricilərinə görə, bir müddət dünya gündəmində qalıb. Daha bir maraqlı məlumat isə Sofiyanın vətəndaşlığı ilə bağlıdır. Deməli, Əliyev rejimi ilə eyni üsul-idarəni bölüşən Səudiyyə Ərəbistanındakı hakimiyyət Sofiyaya vətəndaşlıq verib. Həmin Səudiyyə rejimi ki, dünya gündəmindən düşmür. Öz vətəndaşını boğaraq qətlə getirdikdən sonra, üz dərisini soyaraq, cəsədini mişarla tikələrə bölən Səud hakimiyyəti dəmir parçasından düzəldilən əşyaya vətəndaşlıq verir. Bununla, demək istəyir ki, dilsiz əşya, tərpənən insandan daha önəmlidir. Günlərin bir günü eşitsəniz ki, vətəndaşları qətlə yetirib, dəmir parçalarına şəxsiyyət vəsiqəsi paylanılıb, Ərəbistanda, şübhə etməyin. Zatən, Yəməndə törətdiyi qətllər, öz ölkəsində digər məzhəb daşıyıcılarına qarşı soyqırımlar, heç kimi narahat eləmir. Nə Qərbi, nə Amerikanı, nə də Türkiyəni. Bu günlərdə məlumat yayıldı ki, Türkiyə Səudiyyə ilə əlaqələrini pozmaq istəmir. Çünki, ABŞ belə istəyir və yaxud, elə və yaxud…

Qayıdaq İmişliyə. Keçən il müəllim və həkimlərin pambıq sahələrinə tökülüşdüyü İmişliyə. Bu il deyəsən, pambıq sahədə qalıb, heç yığan da yoxdur. Neft bahalaşıb, sahibkar da bir kilosu üçün 10 qəpik verib yığdırmaq istəmir. Axı, kilosunu heç 10 qəpiyə sata bilməyəcək. Kimdir, pambıq alıb, satan? Ölkəmiz o qədər „inkişaf“ edib ki, İmişlidə Asan Xidmətin açılışına Koreyadan robort gətirir, İlham müəllim. Görəsən, Sofiyanın hər saatı üçün koreyalılara nə qədər pul ödənilib? Azad mətbuat olsaydı, Sofiyaya nə qədər kürü verildiyini, yaxud gecə 12-dən sonra yanına kimin göndərildiyini araşdırardı. Üzgünəm, belə məlumatları əldə edə bilməmişik, hələlik.

İlham müəllim görəsən, Sofiyanı niyə İmişlidə qəbul elədi? Sofiya ilə səmimi danışmaqla kimə hansı mesajları ötürdü? Onun gözəl və cazibədəar olduğunu deməklə nə etmək istəyirdi? Yaxud, Sofiya ölkəmizdə nə qədər qalacaq? Bakı sürüşməsindən xəbəri olacaqmı? Ümumiyyətlə bu səfər Azərbaycana neçə milyona başa gəlib? Və sair suallar cavabsız qalır. Bu barədə heç kim sual verməsin, tələsən yerimiz yoxdur, Parlamentə düşmək lazımdır.

Söhbət parlamentdən düşmüşkən, bir təklif vermək istəyirəm. İlham müəllim, Cənubi Koreyaya sofiyadan 125 ədəd sifariş versin. “Ermənilər əyilə-əyilə gəzməlidirlər“, yaxud “Avropa bizə, İlahm Əliyev kimi prezidentimiz olduğu üçün xainlik edir“ və bəzilərinə də müxtəlif səslər yazsınlar. Parlamentdə oturanlar, Sofiyadan nə ilə fərqlənirlər ki, büdcədən bu qədər əlavə rasxod xərclənir? Bunlar da gedib, viogara, zad alırlar…

Prezident yaxşıdı, məmurlar özbaşınalıq edirlər, bir balaca çörək pulu çıxan iş tapsaydım hər şey əla olardı! Göydən üç alma düşdü, inciməyin üçü də Sofiyanın. Axı o, çox hörmətli qonaqdır və qayıdandan sonra Cənubi Koreyada Asan Xidməti təbliğ edəcək!

Sonra Azərbaycan Respublikasının Prezidenti Cənab İlham Əliyev adından Sofiyanın şərəfinə ziyafət təşkil olunub.

indeksCavid Cabbarlı

Ərbəin ziyarətinin hökmləri

Sual-1: Günümüzün mövcud məsələlərini nəzərə alsaq, Ərbəin ziyarəti indiki zamanda vacibdirmi?
Cavab: Ərbəin ziyarəti müstəhəbdir.

Qanunlara riayət etmək
Ərbəin ziyarəti üçün passport
Sual-2: Ərbəin ziyarəti üçün viza almağın hömkü nədir?
Cavab: Hər bir halda qanunlara riayət etmək lazımdır.

Başqasının passportundan istifadə etmək
Sual-3
: Ərbəin ziyarəti günləri yaxınlaşır və passport almaq üçün kifayət qədər vaxt yoxdur. Qardaşımın razılığı ilə onun passportundan istifadə edərək Ərbəin ziyarətinə gedə bilərəmmi? Belə olan surətdə şəri baxımdan ziyarətə getməyin maneçiliyi varmı?
Cavab: İstənilən halda qanunlara riayət etmək lazımdır və qanun pozuntusuna yol vermək olmaz.

Dərs günlərində Ərbəinn ziyarətinə getmək
Sual-4
: Dərs günlərində Ərbəin ziyarətinə getmək olarmı? 
Cavab: Qeyd olunan məsələ Təhsil Nazirliyinin qanun və qaydaları ilə tənzimlənir.

Xəstəliyin ağırlaşacağı ehtimal edildiyi təqdirdə səfərə çıxmaq
Sual-5: 
1) İmamların (ə) tövsiyələrinə əsasən Ərbəin ziyarəti savabdır. Mənim qoca anam da bu ziyarətə getmək istəyir. Amma son günlər xəstəlik keçirdiyi, nəticədə, bədəni fiziki cəhətdən zəiflədiyi, xəstəliyinin yenidən qayıdacağı və qayıdarsa, vəziyyətinin daha da pisləşəcəyi ehtimal edildiyi üçün həkimlər ona bu səfərə çıxmağı qadağan ediblər. Belə olan halda onun Ərbəin ziyarətinə getməyinin hökmü nədir?
2) Mənim də qoca nənəm bu ziyarətə getmək istəyir, ancaq dizləri ağrıyır. Ayaqlarının ağrılarının kəskinləşəcəyi ehtimal edilirsə, onun bu səfərə çıxmasına icazə varmı?
Cavab (1 və 2): Əgər zərər gözəçarpacaq dərəcədə olacaqsa, xeyr, icazə yoxdur.

Atanın icazəsi olmadan səfərə çıxmaq
Sual
-6: Mən universitetin axırıncı kursunun sonuncu smestrində oxuyuram. Ərbəin ziyarəti üçün Kərbəlaya getmək istəyirəm. Əminəm ki, atam Ərbəin səfərinin izdihamını və bəzi məsələləri nəzərə alaraq mənim bu səfərə çıxmağıma icazə verməyəcək. Mən ailəmə xəbər vermədən səfərə çıxa və bu barədə onlara səfər əsnasında xəbər verə bilərəm?
Cavab: Əgər valideynlərinizə xəbər vermədən bu səfərə çıxmağınız onların inciməsinə səbəb olarsa, xeyr, icazə yoxdur. Habelə atanız atalıq şəfqəti üzündən səfərə çıxmağınıza razı deyilsə, ona itaət edin.

Borclu adamın səfərə çıxması
Sual-
7: Dostlarına və ya qohumlarına borcu olan şəxs Ərbəin ziyarətinə gedə bilərmi?
Cavab: Borcun ödənilmə vaxtı çatmayıbsa və ya borc sahibi borcu ödəmək üçün möhlət verirsə, eybi yoxdur. Əgər borcun ödəniş vaxtı çatıbsa, borclu borcunu vermək iqtidarındadırsa və borc sahibi də borcunu tələb edirsə, əvvəl borc ödənilməlidir. Mükəlləf borcunu ödəməmək kimi bir vacibi tərk etmək niyyəti ilə səfərə gedərsə, namazı tamdır. Amma səfərə çıxmaqda məqsədi borcdan qaçmaq deyilsə, namazı qəsrdir.

Ərbəin ziyarətinə aid olan nəzirlər 
Ərbəin və digər ziyarət səfərlərində yemək bişirmək nəzri
Sual-8: Bir xanımın hər il Ərbəin günü yemək bişirmək nəzri vardır. Həmin xanım bu il piyada Ərbəin yürüşünə qatılamq istəyir. Buna görə də Ərbəin günü İraqda olacaq. Onun vəzifəsi nədir və nəzrini necə yerinə yetirməlidir?
Cavab: Əgər "şəri nəzir siğəsi" oxumayıbsa, nəzrinə əməl etmək vacib deyil. Amma "nəzir siğəsi"ni şəri cəhətdən müəyyən edilmiş şərtlərə riayət edərək oxuyubsa, nəzir etdiyi kimi əməl etməlidir. Nəzri pozmaq olmaz.

Nəzrin vaxtını dəyişmək
Sual-9
: Bir nəfərin Ərbəin günü ilə bağlı nəzri varsa, onu bir gün qabağa sala bilərmi?
Cavab: Əgər "əməli risalələr"də qeyd edilən "şəri nəzir siğəsi"ni oxumayıbsa, nəzrinə əməl etmək vacib deyil və vaxtı dəyişə bilər. Amma "şəri nəzir siğə"sini oxuyubsa və nəzri də müəyyən günə aiddirsə, nəzrinə uyğun əməl etməlidir.

Camaatın nəzirlərindən qalanını depozit bank hesabına yatırtmaq
Sual-10
: Bir neçə dostumla Ərbəin günləri üçün müəyyən məbləğ pul toplamışdıq. Ondan bir hissəsi qalıb. Pulu Ərbəin günlərində istifadə etmək şərti ilə topladığımız üçün gələn Ərbəinədək istifadəsiz qalacaq. 
1) Bu pulu depozit bank hesabına yatırtmaq və habelə pulun üzərinə gələn faizi gələn ilin Ərbəin mərasimində istifadə etmək olarmı?
2) Hal-hazırda həmin pul Xeyriyyə Məqsədli Borc Fondundadır. Bu pulu Xeyriyyə Məqsədli Borc Fondunda saxlamağın problemi varmı?
Cavab: 
1) Pul sahiblərinin razılığı olarsa və bank faizi də İslami ticarət müqavilələrindən birinə uyğun olarsa, eybi yoxdur. 
2) Pulu Xeyriyyə Məqsədli Borc Fondunda saxlamağın problemi yoxdur.

Ərbəin nəzirlərindən artıq qalanını başqa yerdə istifadə etmək
Sual-11
: Camaat tərəfindən Ərbəin mərasiminin keçirilməsi üçün bir az pul, stəkan, çay, qənd və sair vəsait hədiyyə edilmişdi ki, bundan bir miqdarı artıq qalıb. Həmin qalan vəsati il ərzində İmam Hüseyn (ə) adına təşkil edilmiş digər məclislərdə isitfadə etmək olar, yoxsa gələn ilin Ərbəin mərasiminə saxlanılmalıdır? 
Cavab: Hədiyyə edənlərin razılığına bağlıdır.

Zəvvarların içməsi üçün nəzir edilmiş su ilə dəstəmaz almaq
Sual-12
: Ərbəin zəvvarlarının içməsi üçün nəzir edilmiş, içmək və ya hər hansı başqa bir məqsəd üçün istifadə icazəsinin olub-olmaması, habelə ümumi şəkildə zəvvarların istifadəsi üçün nəzir edilib-edilməməsi məlum olmayan bir su ilə dəstəmaz almaq olarmı? 
Cavab: Sualda qeyd edildiyi kimidirsə, olmaz. Yalnız nəzir sahibinin razı olduğu bilinərsə, buna icazə var.

Çadır xidmətçilərinin xərcləri
Sual-15
: İmam Hüseynin (ə) Ərbəin mərasimi vaxtı Nəcəfdə, Kərbəlada, ümumiyyətlə, İmam Hüseyn (ə) zəvvarlarının hərəkət etdikləri yollarda zəvvarlardan bir neçə nəfəri yol kənarlarında qurulmuş çadırlarda daim xidmət göstərir. Bu adamlar eyni zamanda özləri də zəvvardırlar. Çadır sahibləri bilmək istəyirlər ki, həmin xidmətçiləri Ərbəin mərasiminə ezam etmək üçün (viza, gediş-gəliş pulu və s...) camaatın verdiyi hədiyyə və nəzirlərdən istifadə etmək olarmı?
Cavab: Hədiyyə edənlərin niyyətinə bağlıdır. Əgər onlar ümumi şəkildə niyyət ediblərsə, eybi yoxdur.

Ərbəin günü Kərbəlada olmaq
Sual-16
: Ərbəin ziyarəti zamanı həmin gün mütləq, Kərbəlada olmalıyıq, yoxsa, bir gün öncə və ya bir gün sonra da Kərbəlada olmaqla Ərbəinin savabını qazanmaq olar?
Cavab: Həzrət İmam Hüseynin (ə) ziyarəti hər zaman müstəhəbdir və böyük savabı vardır. Amma xüsusi bir zaman üçün təyin edilmiş ziyarətin savabı həmin zamana aiddir. Əlbəttə, bəlli bir zaman üçün təyin edilmiş savaba nail olmaq ümidi ilə bir ziyarətin öz xüsusi vaxtından öncə və ya sonra yerinə yetirilməsinin heç bir maneçiliyi yoxdur.

İnsanların izdihamı və "Ərbəin"dən əvvəl ziyarət
Sual-17
: Ərbəin vaxtı piyada karvanına başçılıq edirəm. Nəcəfdən Kərbəlaya qədər olan məsafəni piyada qət edirik. Kərbəlaya "Ərbəin"dən əvvəl çatırıq. Ərbəin ziyarəti üçün Ərbəin günü Kərbəlada qalmaq vacibdirmi, yoxsa Kərbəladakı izdihamı nəzərə alaraq "Ərbəin" ziyarətini yerinə yetirib İrana qayıda bilərik? 
Cavab: Şəri baxımdan maneçiliyi yoxdur. Karvana rəhbərlik edən şəxslərlə zəvvarlar arasında Ərbəin günü Kərbəlada qalmaq barədə şərtləşmə olduğu təqdirdə isə, şəri baxımdan bunun problemi var.

Hərəmi kənardan ziyarət etmək
Sual-18
: Ərbəin günü izdiham yarandığı üçün hərəmə girmək və iki hərəmin arasında (beynul-hərəmeyn) hərəkət etmək ya çox çətin, ya da qeyri-mümkün olur. Bəzən bu, başqalarının narahatlığına səbəb olur. Belə olan halda Ərbəin ziyarətini hərəmin kənarından oxumaq kifayət edirmi?
Cavab: Sualda fərz olunan halda kifayət edir.

Aybaşı halında olan xanımların ziyarət etməsi
Sual-19
: Aybaşı olduqları vaxt xanımların hərəmlərə girməsinin hökmü nədir?
Cavab: Ehtiyat vacibə görə, heyizli xanımların məsumların (ə) hərəmində, yəni günbəzin altında və pak qəbirlərin olduğu hissədə dayanmasına icazə yoxdur. Amma məscid hökmündə olmayan digər hissələrdə, o cümlədən hərəmə bitişik olan salonlarda dayanmağın eybi yoxdur.

Ərbəin ziyarətinə qədər qara libas geyinmək
Sual-20
: Ərbəin gününədək qara paltar geyinməyin maneçiliyi varmı? Bu əməl məkruhdurmu?
Cavab: Məsumların (ə) matəm günlərində qəmli olduğunu göstərmək və İlahi simvolları uca tutmaq məqsədi ilə qara paltar geyinmək savabdır.

Ərbəin günü işləmək
Sual-21
: Ərbəin günü işləmək olarmı?
Cavab: Bunun öz-özlüyündə heç bir eybi yoxdur.

Ayətullah Seyyid Əli Xamenei

Bazar ertəsi, 22 Oktyabr 2018 16:12

Azərbaycanda qadın hakim istefa verdi

Yazan

Yasamal rayon məhkəməsinin hakimi istefa verib.

“Qafqazinfo”nun verdiyi xəbərə görə, hakim Aytən Mirzəzadə bir müddət əvvəl Məhkəmə Hüquq Şurasına ərizə verərək səlahiyyətlərinə vaxtından əvvəl xitam verilməsini istəyib.

MHŞ-nin növbəti iclasında xanım hakimin ərizəsinə baxılacaq. Məlumata görə, A.Mirzəzadə bundan sonra vəkil kimi fəaliyyətini davam etdirəcək.

Qeyd edək ki, 37 yaşlı A.Mirzəzadə Bakı Dövlət Universitetinin Hüquq fakültəsinin bakalavr və magistratura pillələrini bitirib. 2005-ci ildən 2010-cu ilədək Ədliyyə Nazirliyi Bələdiyyələrlə iş mərkəzinin mütəxəssisi, aparıcı məsləhətçisi vəzifəsində, daha sonra isə 3 il ərzində Ədliyyə Nazirliyi Qanunvericilik baş idarəsinin inzibati və hərbi normativ aktlar idarəsinin aparıcı məsləhətçisi vəzifəsində işləyib. Son 5 ildə də hakim kimi fəaliyyət göstərib.

Bazar ertəsi, 22 Oktyabr 2018 16:08

“Hicab məhbusu“na əlavə ittiham verilib

Yazan

Hüquq müdafiəçisi Oqtay Gülalıyev bildirir ki, ötən ay «hicab məhbusları»ndan biri kimi tanınan Telman Şirəliyev haqqında əlavə cinayət işi açılıb.

Bu barədə AzadlıqRadiosuna danışan hüquq müdafiəçisi hesab edir ki, yeni ittiham sırf siyasi məqsəd daşıyır.

«Hakimiyyət çox pis bir tendensiyanın əsasını qoyub. Günahsız insanları şərləyib həbs edirlər, cəza müddəti bitəndə həbsdən buraxmamaq üçün onlara qarşı yeni qondarma cinayət işi açırlar», - deyə o vurğulayıb.

Hüquq müdafiəçisi əlavə edib ki, eyni halla bundan öncə keçmiş səhiyyə naziri Əli İnsanov və Azərbaycan Xalq Cəbhəsi Partiyası (AXCP) sədrinin müşaviri Məmməd İbrahim üzləşiblər.

«Sentyabrın sonunda daha bir dindar siyasi məhbus Telman Şirəliyevə cinayət işi açılıb, həbsdən çıxmasına imkan verməyiblər», - deyə o qeyd edib.

O.Gülalıyevin deməsinə görə, məhkəmə qərarı ilə T.Şirəliyev 1 Saylı Kürdəxanı Təcridxanasına köçürülüb: «Bunu yastığının altından biz çıxması ilə əsaslandırıblar. Guya yastığının altından biz çıxıb. Amma əslində... Telman Şirəliyevə bir neçə dəfə aylar öncə təklif ediblər ki, əfv ərizəsi yazsın. O, bu təklifi qəbul etməyib».

Hüquq müdafiəçisinin deməsinə görə, azadlığa çıxmasına sayılı günlər qalan T.Şirəliyev haqqında Cinayət Məcəlləsinin 317.2-ci maddəsi ilə cinayət işi açılıb. Söhbət cəzaçəkmə müəssisəsinin və ya istintaq təcridxanasının əməkdaşını zor tətbiq etməklə hədələmədən gedir. Yeni ittiham sübuta yetirilərsə, ona əlavə olaraq 7 ilə kimi həbs cəzası verilə bilər.

Hüquq müdafiəçisinin bu dediklərinə, hələlik, Penitensiar Xidmətdən və başqa rəsmi qurumlardan münasibət almaq mümkün olmayıb.

Ancaq Azərbaycan rəsmiləri, bir qayda olaraq, ölkədə insanların əqidələrinə görə həbs və təqib olunması ilə bağlı deyilənləri qəbul etmirlər.

Telman Şirəliyev 2012-ci il oktyabrın 5-də Təhsil Nazirliyi qarşısında «hicaba azadlıq» şüarı ilə keçirilən aksiya ilə bağlı həbs edilib. 2013-cü il iyunun 5-də məhkəmənin qərarı ilə 6 il həbs cəzası alıb.

Həmin hadisə ilə bağlı ümumilikdə 35 şəxs həbs edilmişdi. Xuliqanlıq və başqa cinayətlərdə ittiham edilən bu şəxslər 1 il 6 aydan 6 ilə kimi həbs cəzaları almışdılar.

Bazar ertəsi, 22 Oktyabr 2018 00:40

Kəmaləddin Heydərova məxsus hotel bağlandı

Yazan

Oktyabrın 22-də Lənkəranda yerləşən "Qafqaz Sahil Hotel”in rəsmən bağlandığı açıqlanıb. 

Bu barədə Arqument.Az-a hotelin əməkdaşları məlumat veriblər. 

Onlar bildiriblər ki, "Gilan Holdinq"ə daxil olan "Qafqaz Sahil Hotel” sabahdan rəsmən fəaliyyət göstərməyəcək.

2008-ci ildən fəaliyyət göstərən və həmin il ölkə başçısı İlham Əliyev tərəfindən rəsmi açılışı edilən otelin 42 işçisi olub. 

"Ayın 8-də bildirişə qol çəkdik. Dedilər ki, 15 gün sonra hotel rəsmən bağlanır. Sabah son gündür. 42 professional personal işsiz qaldı. 10 il idi ki, burada çalışırdıq. 8 oktyabr 2008-ci ildə açılışı olmuşdu, 22 oktyabr 2018-ci ildə də bağlandı. Heç kəsə də kompensasiya verilməyib hələ ki. Amma deyiblər ki, verəcəyik", - onlar bildiriblər. 

Hoteldən bağlanmaqla bağlı məlumatı Arqument.Az-a təsdiqləyiblər. Bildiriblər ki, hamı işdən azad olunub və sabahdan qonaq qəbul olunmayacaq. 

"Gilan Holdinq"ə daxil olan "Qafqaz Sahil Hotel” 2008-ci ildən fəaliyyət göstərirdi. 

Hotelin Fövqəlada hallar naziri Kəmaləddin Heydərova məxsus olduğu iddia olunurdu. 

Lerik rayonunun 400-ə yaxın sakini öz imzaları və şəxsiyyət vəsiqələrinin seriya nömrələrini qeyd etməklə ölkə başçısına müraciət ünvanlayıblar. Rayonun Şingədulan icra nümayəndəliyinə daxil olan kəndlərin sakinləri prezidentə müraciət etməklə, rayon rəhbərliyindən narazılıqlarını ifadə ediblər.

Bu barədə sakinlər Vizualaz.org-a məlumat veriblər.

Sakinlər deyiblər ki, rayon rəhbərliyi ölkə başçısını aldadır. Onlar bildiriblər ki, oktyabrın 16-da cənub regionuna səfəri çərçivəsində dövlət başçısı İlham Əliyev Astara və Lerikdə də olub. O, Lerikdə bir sıra obyektlərin, yeni avtomobil yolunun, park kompleksinin və idman obyektlərinin açılışında iştirak edib. Amma Noda-Şingədulan və Xanagah yolunun rəmzi açılışını edib.

Sakinlər deyiblər ki, yol tanınmaz halda olduğuna görə, ölkə başçısından gizlədiblər.

Bundan başqa, Şingədulan icra nümayəndəliyinə daxil olan kəndlərin sakinlərinin ölkə başçısı ilə görüşməsinə maneə yaradılıb. Heç kəsə problemlərlə bağlı ölkə başçısına müraciət etməyə imkan verilməyib.

Sakinlər deyiblər ki, bu kəndlərin əsas problemi mavi yanacaqla bağlıdır. Kəndlər meşədən odun qırıb gətirməklə soyuqdan qorunur, gündəlik yemək tədarüklərini odun peçləri vasitəsilə həyata keçirilər. Amma son bir neçə ayda onlara meşədən hətta quru və yararsız odunları da yığıb gətirməyi qadağan ediblər.

Ölkə başçısına müraciət edən sakinlər rayon rəhbərliyinin, xüsusən də, icra başçısı Rövşən Bağırov və onun birinci müavini Cəlil Baxşıyevin fəaliyyətindən şikayətçidirlər. Müraciət müəlifləri deyiblər ki, rayonu faktiki dözülməz idarəçilik həddinə gətirən Baxşıyev "Dırıq" bölgəsi üçün heç bir iş görmür.

Sakinlərin ölkə başçısına ünvanladıqları müraciətin tam mətnini yaxın günlərdə dərc edəcəyik.

Vəkil: ”Biz hüquqi addımlarımızı atacağıq”

Bakı Apelyasiya Məhkəməsi oktyabrın 19-da müsavatçı Azad Həsənovun haqqında 4 aylıq həbs qətimkan tədbirini qüvvədə saxlayıb.

Prosesdə Azad Həsənov da iştirak edib.

Məhkəmədən sonra jurnalistlərin suallarını cavablandıran vəkil Osman Kazımov deyib ki, Azad Həsənovu oktyabrın 11-də Hövsan qəsəbəsində saxlaylblar, onu Bakı Baş Polis İdarəsinin mülki formada olan əməkdaşları 99 662 dövlət nömrə nişanlı “Hunday” markalı maşında aparıblar və yaxınlarına məlumat verməyiblər. Hətta onu zorla aparanlar özlərinin polis əməkdaşı olduqlarını da deməyiblər. İdarədə onu təhdid edib cibinə narkotik maddə qoyublar. İdarədə Azad Həsənova deyiblər ki, əgər boynuna almasan, işgəncə veriləcək. Azad Həsənov görüb ki, çıxış yolu yoxdur, ona deyilənləri yazıb.

“Özü bu barədə məhkəmədə danışdı və Baş prokurora da şikayət göndərilib. Oktyabrın 12-də isə onu Xətai Rayon Məhkəməsinə aparıblar və 4 ay həbs qətimkan tədbiri haqda qərar çıxarılıb. Amma dəvət olunan müdafiəçi çıxarılan qərardan şikayət verməyib”,- vəkil deyib.

Osman Kazımov bildirib ki, onlar Baş Prokurorluğun “qaynar xətt”inə həmin gün məlumat versələr də, heç bir reaksiya olmayıb:

“Yalnız iki gün sonra “qaynar xətt”dən mənə zəng edib Azad Həsənovu tapıb-tapmamağımızı soruşublar. Çox qəribədir ki, polisə nəzarət edən qurum bizdən soruşur”.

Osman Kazımov məhkəmədə çıxarılan qərarın qanunsuz olduğunu söyləyib:

“Azad Həsənovun istintaqdan yayınması, qaçıb gizlənməsi üçün əsaslar yoxdur. Ancaq buna baxmayaraq, məhkəmə arqumentlərimizi qəbul etmədi və qərarı qüvvədə saxladı. Bununla belə, biz hüquqi addımlarımızı atacağıq”.

Azad Həsənov Cinayət Məcəlləsinin 234.4.3-cü (narkotik vasitələri hazırlama, əldə etmə, saxlama, göndərmə, daşıma və ya satma) maddəsi ilə ittiham edilir. Cinayət işini Bakı Şəhər Baş Polis İdarəsi aparır. İttiham sübuta yetirilərsə, A.Həsənovu əmlakı müsadirə olunmaqla 5 ildən 12 ilədək həbs gözləyir.

3 -dən səhifə 197