Friday, November 24, 2017

Çərşənbə axşamı, 20 İyun 2017 00:00

SORĞU: “Ev almağa haqqı olan 68 jurnalist” - SİYAHI

Yazan

Jurnalistlərə veriləcək evlər hansı meyarlar əsasında bölüşdürüləcək?!

Uzun illərdir ki, Azərbaycan jurnalistlərinə tikilən və üzdə pulsuz paylanan evlərin müzakirəsi bitmək bilmir. Bunu jurnalist azadlığının buxovlandığı kimi qiymətləndirənlər var və bəndəniz ilk gündən bu cinahda yer alıb. Yəni kəsdirmədən getsək və birbaşa münasibət bildirsək, jurnalist niyə dövlətin, ya da hökumətin, yaxud dövlətin mətbu siyasətini müəyyənləşdirən balaca bir məmurun əlinə baxmalı, iki dodağının arasında qalmalıdır ki. Milyonlara milyonlar deməyən bir dövlət elə bir mətbu siyasət qura bilər ki, bütün jurnalistlərin, nəinki jurnalistlərin, eləcə də hamının, dayalı-döşəli evləri ola bilər. Bunu etmək 2×2 qədər asandır. O, ayrı məsələdir ki, bizim hakimiyyətimiz 2×2-dən 4 yox, istəyəndə 5, istəyəndə 15 alır.

 Ev almaq üçün həyat yoldaşlarını boşayanlar var?!

Ötən dəfə jurnalistlər üçün tikilən ev, Azərbaycan mətbuatına hakim olan zümrənin iş üzünü açıb tökmüşdü. Söz-söhbətlər hələ də səngimir. O zaman məlum olmuşdu ki, hətta belə olsa belə, hakim zümrə ideyalar və prinsiplərə yox, öz şəxsi maraqlarına çalışıb. Özünə 2-ci, 3-cü ev alana bax, oğluna, yaxınlarına, hətta adını yazmağa ar elədiyimiz adamlarına ev alanlara bax. Bu haqda bilməyən yoxdur və hamı hamısını tanıyır və indiyə qədər danışır. Maraqlı orasıdır ki, bu adamların heç biri utanmadı, qızarmadı, çəkinmədi. Hələ bu azmış kimi, indi də qollarını çırmalayanlar, 3-cü oğluna, 4-cü dərəcədən arvad qohumlarına, redaksiyalara yerləşdirdikləri kənar məhrəmlərinə ev almaq uğrunda dəridən-qabıqdan çıxanlar var. O günü Rey Kərimoğlu yazdı, sonra sildi və məlum oldu ki, hətta ev almaq üçün həyat yoldaşlarını boşayanlar var. Adam düşünməyə bilmir, bu media bataqlığında necə informasiya təhlükəsizliyinə nail olmaq olar? Necə sağlam mənəvi dəyərlərdən danışmaq olar? Necə peşəkarlıqla məşğul olmaq olar? Heç bir ədalət tərəsizi olmayan, sağlam və peşəkar qələmlərin axırına çıxan, müstəqil və cəsur qələmlərin qətlinə fərman verən, məhkəmə və istintaqlarda jurnalistlərin üzünə duran adamların ev paylama ədalətinə necə inanmaq olar? Olmaz təbii ki…

 Yürüyən bir prosesə istiqamət vermə cəhdləri

Amma başlayan və yürüyən bir proses var. Biz o prosesin qarşısında dayana bilmirik. Bu proses ində də 256 evlik binanı paylaşdırmağa və bölüşdürməyə çıxarıb. Barmaqla sayılacaq jurnalistin qalmadığı ölkədə 256 jurnalistə ev verəcəklər. İndidən məlumdur ki, artıq siyahılar hazırdır. Prezident Administrasiyasının koridorlarında kimə nəyin müqabilində ev veriləcək, o da müəyyənləşdirilib və KİVDF-nin ədalət anlayışı olmayan otaqlarına ötürülüb. Elə deyirlər və elədir. Nəinki indi, hətta aylar, illər əvvəldən bu siyahının hazır olduğuna inananlardan biri də mənəm və bu prosesə laqeyd qala bilmədiyim üçün heç olmasa, tarixə müraciət olsun deyə bir kiçik sorğu keçirdim. Sorğu belə idi:

“Mən hökumətin jurnalistlərə payladığı evlərə iddialı deyiləm. Həm də bu tip bir “imtiyaz”a qarşıyam. Amma yenə başlanan həngaməyə laqeyd qala bilmədim. Madam ki, hökumət daha 256 ev vermək istəyir, o zaman gərək o evlər haqqı olanlara verilsin. Kimlərinsə qohum-əqrəbalarına, yaxınlarına, oğul-uşaqlarına yox. Ona görə də hər kəs tanıdığı haqqı olan qələm adamının adını yazsın. Biz də bir siyahı müəyyənləşdirək…”

Beləcə, 26 may 2017-ci il tarixindən davam edən sorğumuzun nəticəsi artıq məlumdur. Təxminən 100 nəfərin iştirak etdiyi sorğunun yekununda cəmi 72 nəfər jurnalistin adı yer alır. Təbii ki, bu, yalnız bir və ya bir neçə adamın apardığı və facebook statuslarının nəticəsində meydana çıxan sorğudur. Əgər hökumətimiz və onun media siyasətini yürüdənlər istəsələr, o qədər mükəmməl və o qədər ədalətli bir siyahı ortaya çıxar ki, heç kim də narazı qalmaz.

 Seçimdə ədalət olacaqmı?!

Sorğunun nəticələrinə və aldığım reaksiyalara söykənərək, onu deyə bilərəm ki, seçimdə ədalətin olmayacağına yenə ciddi bir əminlik hakimdir jurnalistlərin arasında. Qoyulan ağır şərtlər də bunu göstərir. Əvvəla, məlum olan odur ki, bu dəfəki bölüşümdə də peşəkarlıq əsas kimi götürülməyəcək. Artıq bir neçə holdinq rəhbərinin də açıq etiraflarını nəzərə alsaq, məlum olur ki, bu dəfə də hakimiyyətə, rejimə xidmət birinci sırada gələcək. Yəni nə qədər peşəkar olursansa ol, nə qədər yadda qalan yazıların və media layihələrinin müəllifi olursansa ol, sənə mükafat yoxdur, amma ömründə bir yazı yazma, əsla və əsla mətbu düşüncən olmasın, lap qəssab ol, rejimə xidmət edirsənsə, sənə ev verilə bilər. Vəssalam. Bu qədər sadə.

Hələ qazanların qapaqları bağlı qaynayır. Redaksiyalarda narazılıq və nigarançılıqla keçirilən seçimlərin nəticələrindən mətbuata sızan da olur, sızmayan da. Biz “Bizim yol”da baş verən seçkilərdən xəbərdarıq. Mətbuata çıxdı, ədalətsizliyin qarşısı mətbu təpkidən sonra alındı, hələ ki, zorakı ədalət təmin olundu, amma “Bizim yol” qaynayır. Ev bölüşümündən sonra ədalətsizlik olarsa, burada fırtına qopacaq.

Vüqar Səfərli Əflatun Amaşovu niyə ittiham etdi?

“Yeni Azərbaycan” qəzetində seçim daha gərgin olub. Verilən məlumatlara görə, oradakı iclasda KİVDF-nin icraçı direktoru Vüqar Səfərlinin özü iştirak edib və ötən ev bölüşümündə Mətbuat Şurasının sədri Əflatun Amaşovun ədalətsizliyindən danışıb. Sən demə, Əflatun Amaşov özünə yaxın bəzi adamların adlarını siyahıya saldırmaq istəyib, ancaq Vüqar Səfərli bu ədalətsizliyin qarşısını ala bilib. Vüqar Səfərlinin “Yeni Azərbaycan” qəzetində Mətbuat Şurasının sədri, deputat Əflatun Amaşov haqqında dediyi fikirlər media kuluarlarında bomba kimi partladı, amma bu haqda da bir xəbərə rast gəlmədik.

Başqa xəbərlər də dolaşır. Elə redaksiyalar var ki, tək bir adamla iclas keçirirlər. Elə redaksiyalar var ki, oradan yalnız baş redaktorun qohumları namizədliklərini irəli sürə bilirlər. Elə redaksiya-holdinqlər var ki, bir dəfə ev alan jurnalistlərin namizədliklərini bir daha irəli sürüblər. Elə redaksiyalar var ki, qoyulan şərtlərə əməl etməyərək, 2 yaşları tamam olduğu halda, iclas keçirib evə iddia ediblər. Amma ev almaq şərtlərini müəyyənləşdirənlər 3 yaşlarının tamam olmadığını əsas gətirib bir çox redaksiyaları yarışdan kənarda saxlayıblar. Bu, necə olur? Hələlik bu xəbərlər mediaya ayaq aça bilmir, amma ayın 22-dən sonra media cameəsinin “Qaynar Qazan”a dönəcəyinə əminəm və indidən hamısını “Qaynar Qazan”a dəvət edirəm.

 İddialılara “xəbərdarlıq” tələsi…

Ümumiyyətlə, KİVDF-nin və onun da üstündə Prezident Administrasiyasının qoyduğu oyun qaydaları da maraqlı məqamlarla yadda qalır. 3 il davamlı fəaliyyət şərti qoyulub, amma 2 il fəaliyyət göstərən “papasının gül balası saytlar” var ki, bu şərtə əməl etməyiblər. Ya da hamı sənədlərini təqdim edir və hamının sənədlərini də götürürlər, amma bu tərəfdən də şərtlərdə “xəbərdarlıq” almamaq şərti də var. Əksər sayt və qəzetləri isə Baş Prokurorluq və ya digər hüquq-mühafizə orqanı “xəbərdarlıq” nişanı ilə təltif edib. İndi bu redaksiyalar, ya da jurnalistlər iki arada bir dərədə qalıblar. Başlarına nə çarə qılacaqlarını bilmirlər. Onlar müsabiqədən kənarda saxlanılacaqlar, yoxsa onlara da ev veriləcək? Anlaşılan odur ki, şərtlərin bu cür qoyulmasının səbəbləri var. Kimə istəsələr ev verəcəklər, kimə istəməsələr verməyəcəklər. Ona görə hər şeyi belə “ərəb saçı”na çeviriblər.

 Jurnalistlərə evləri kim verir, Prezident, yoxsa?!

Ayrıca, ölkənin mətbu siyasətini müəyyənləşdirən məmurun adı hamının qulaqlarında çınlamaqdadır. Prezident qalıb bir kənarda, birinci vitse-prezident qalıb digər tərəfdə, adamlar evin konkret adı çəkilən məşhur məmur tərəfindən verildiyini və qaydalara riayət edilməli olduğunu bəyan edirlər. Bu, ötən binada da belə olub. O zaman da Əli Həsənov güclü bənd olub. İndi də elədir. O qədər ki, jurnalistlərə verilən binanın birinci mərtəbəsi onun ailə üzvlərinin sahibi olduğu hansısa şirkətlərdən birinin sərəncamına verilib. Yəqin ayın 22-dən sonra bu haqda da məlumatlarla tanış ola biləcəyik.

Hələliksə, qoparılacaq səs-küyün qarşısını almaq üçün yeni – 3-cü binanın təməlinin atılacağı xəbərlərini dövriyyəyə buraxıblar. İndi də eynilə ötən dəfəki kimi “bu dəfə ev almayanlara gələcəkdə tikiləcək binadan ev veriləcək” yayqarası buraxılacaq, əlacsız qələm əhli daha bir neçə ili o ümidlə yaşayacaq. Beləcə, Azərbaycan jurnalistikasının üstündən asılı olan “Domokl qılıncı” daha bir neçə il passiv və dirənişsiz jurnalistikanın başının üstündə qalacaq.

Xüsusilə, ev almağa haqqı çatan jurnalistlərin adlarını görmək istədik. Adları yazılanların əksəriyyəti ilə yaxından tanışlığım yoxdur. Bəzilərinin adlarını ilk dəfədir görürəm, amma inanıram ki, ədalətli seçimdir. Ədalətsiz olsaydı, dərhal şərhlərlə bir-birilərini tənzimləyə bilərdilər. Hətta siyahımızda bəzi adlar var ki, onlar hazırda ya hakimiyyət qəzetlərində, ya da hakimiyyətə yaxınlığı ilə seçilən qəzetlərdə çalışırlar. Nə fərqi var ki? Ömrünü mətbuata həst edən adamlar məhz jurnalistlər üçün tikilən binadan – əgər həqiqətən belədirsə – niyə ev almamalıdırlar ki? Məntiqli deyilmi?

 Dünyasını dəyişən jurnalistlərə ev verilsin!

Mən hələ 2011-ci ildən təkliflə çıxış etmişdim ki, dünyasını jurnalist işləyə-işləyə dəyişən qələm əhlinə də ev verilsin. O zaman mənim bu təklifimə – xüsusilə, “Milli yol” qəzetinin baş redaktoru Şahin Ağabəyliyə ev verilməsi təklifinə dodaq büzənlər oldu. Onlar iddia edirdilər ki, mən məsələdən əl çəkim ki, onlar rahatca Şahinin ailəsinə ev verdirsinlər. Mən etirazı qəbul etdim, nə də olsa KİVDF-nin rəhbərliyi və ölkə mətbuatının siyasətini müəyyənləşdirənlər məni özlərinə problem kimi görürdülər. Mən kampaniyanı dayandırdım və bu mətbu siyasəti müəyyənləşdirənlər məni həbs etdirə bildilər. Sonra jurnalistlərə ev paylananda mən həbsxana divarları arasında olanları seyr edə bildim. Mənim çəkilməyimi istəyən insanların hamısı özlərinə və yaxınlarına ev aldılar, amma Şahin Ağabəyliyə ev verilmədi. Heç bu haqda dava aparan da görmədim. O baxımdan, elə hesab edirəm ki, jurnalist işləyə-işləyə dünyasını dəyişən həmkarlarımıza da ev verilməlidir və bu, Allaha da, bəndəyə də xoş gedər.

Nə ediriksə edək, bu karvan gedir. Biz bu karvanı saxlaya bilmirik, amma yolunu dəyişdirə, ona təsir edə, yoldakı kol-kosları götürə, ya da kol-kos töküb bir az istiqamətini döndərə bilərik. Sakitcə kənarda oturub tənqid etmək, ev verənləri, ya da alanları qınamaq bəlkə də mümkündür, amma fərqli cür də etmək olar. İndi bizim etdiyimiz odur. Mən şəxsən illərdir tanıdığım adamlar var ki, onların nə olursa olsun ev almalarını istəyirəm və onların ev alandan sonra da dəyişməyəcəyinə inanıram. Mən Elxan Şükürlünü, Rəşad Vaqifoğlunu illərdir tanıyıram. Mənim tanıdığım bu peşəkar və namuslu qələm adamlarının balaları kirayələrdə böyüməməlidir və hər dəfə bu evlərə gedəndə mənim ürəyim bir az daha paralanmamalıdır. Ya da Şahin Ağabəylinin bir oğul balası – Ağasalam atasının xidmətlərinin müqabilində bu evdən almalıdır. Bu, dövlətin də “Baba” olduğunun bir inikası olar və şəxsən bu 3 adamın və adları siyahıda çəkilən digər dəyərli qələm adamlarının adları ev alanlar siyahısında olmasa, ədalətin bərqərar olacağına inamım olmayacaq. Bu qədər bəsit.

Sorğunun nəticələrinə görə, ev almağa haqqı olan jurnalistlər:

  1. Ağa Cəfərli
  2. Aida Eyvazlı
  3. Aləmzər Sadıqqızı
  4. Anar Əhmədov
  5. Anar Xanlarov
  6. Araz Aslanlı (Turkustan.info)
  7. Araz Zeynalov
  8. Arzu Abdulla
  9. Aydın Canıyev (Müstəqil jurnalist)
  10. Aygün Muradxanlı (Korrespondent.az)
  11. Aynur Elgünəş (Müstəqil jurnalist)
  12. Azər Turan Talıbov
  13. Bahar Rüstəmli
  14. Cavid Cabbarlı (Kanal 13)
  15. Ceyhun Musaoglu
  16. Elçin Bayramlı və Lalə Mehralı
  17. Elçin Rüstəmli (“Bizim yol” qəzeti)
  18. Elçin Zahiroğlu (Bakupost.az)
  19. Elxan Şükürlü (Strateq.az)
  20. Elman Abbasov
  21. Elmidar Əliyev (Aztoday.az)
  22. Elnur Məhərrəmli (Azpolitika.az)
  23. Elşad Paşasoy (“Yeni Müsavat” qəzeti)
  24. Ələsgər Əhmədoğlu (Media mütəxəssisi)
  25. Əziz Rzabəyli (Strateq.az)
  26. Fazil Əhməd (“Reytinq” qəzeti)
  27. Fərəməz Allahverdiyev (Novruzoğlu) (Müstəqil jurnalist)
  28. Fərhad Məmmədov
  29. Fərqanə Novruzova
  30. Fərzuq Seyidbəyli (Strateq.az)
  31. Gülnaz Qənbərli (Gununsesi.info)
  32. Hikmət Sabiroğlu (Müstəqil jurnalist)
  33. Jalə Mütəllimova (“Yeni Müsavat” qəzeti)
  34. Kamil Həmidov
  35. Kamran Mahmudov (Müstəqil jurnalist)
  36. Lamiyə Dadaşzadə
  37. Ləman Ələşrəfqızı (Müstəqil jurnalist)
  38. Mahir Məmmədli
  39. Məhəmmədəli Qəribli
  40. Müşfiq Abdulla (Cebhe.info)
  41. Natiq Cavadlı (Müstəqil jurnalist)
  42. Nazlı Ağayeva
  43. Pərvin Kazımoğlu
  44. Rahib Qerib
  45. Ramin Deko
  46. Ramiz Rağıyev (Millətim.info)
  47. Rəşad Vaqifoğlu (“Bizim yol” qəzeti)
  48. Rövşən Ziya Vəziroğlu
  49. Ruslan Xəlil
  50. Rusvat Bayramov
  51. Samid Paşa
  52. Seymur Əhməd (Müstəqil jurnalist)
  53. Səbuhi Rəhimli (“Qoroskop” qəzeti)
  54. Südabə Sərvi
  55. Süleyman Qaradağlı
  56. Şəmşad Ağa (Arqument.az)
  57. Tağı Türk
  58. Tural Aslanlı
  59. Zahid Nurəliyev
  60. Zahir Əzəmət (Qaynarinfo.az)
  61. Zaur Əhməd (mia.az saytı)
  62. Zaur İbrahimli (Strateq.az)
  63. Zaur Qəriboğlu
  64. Zərəngiz Mansurova

Dünyasını dəyişən jurnalistlər:

  1. Ceyhun Nağı
  2. Rafiq Tağı (Müstəqil jurnalist)
  3. Rasim Əliyev (Müstəqil jurnalist)
  4. Şahin Ağabəyli (“Milli Yol” qəzetinin mərhum baş redaktoru)

Ev üçün iddia etməyənlər:

  1. Əvəz Zeynallı (Xural.com)
  2. Heydər Oğuz (Ovqat.com)
  3. Şahvələd Çobanoğlu (“Azadlıq” qəzeti)
  4. Zamin Hacı Vəzir (“Yeni Müsavat” qəzeti)

Sorğu nə deyir:

Diqqət olunduğu kimi sorğumuzda 72 jurnalistin adı çəkilib. Məsuliyyət təbii ki, jurnalsitlərin adlarını çəkib onların evə haqqı olduğunu iddia edənlərin və təqdimatçıların boynuna düşür, amma bir daha söyləməkdə fayda var ki, bu araşdırma səlahiyyətli dövlət orqanlarının – KİVDF-nin, Mətbuat Şurasının və Prezident Administrasiyasının ədalətli hakimləri tərəfindən aparılsaydı, nəticə daha verimli və ədalətli olardı. Oysa, hansısa dövlət qurumlarının içinə doldurulmuş yaxın qohum-əqrəbaya ev paylamaq ədaləti təmin etməyəcək. Bu siyahıda yer alan jurnalistlərin bir çoxunu bütün Azərbaycan tanıyır. Onlar bu haqqdan kənarda qalsalar, ölkə rəhbərliyi bu evi paylamaqdakı əsas hədəfinə və məqsədinə çatmayacaq. Məsuliyyət də qalacaq özlərinin üstündə.

Adı çəkilməsinə baxmayaraq, ən azı 4 jurnalist evdən imtina edir. Bu jurnalistlərin hamısı – içi mən də daxil olmaqla – dövlətin ev paylaması düşüncəsinə rüşvət kimi yanaşan qələm əhlidir. Ölkədə bu insanların sayı 4 deyil, kifayət qədər çoxdur, amma burada əks olunanlar bu qədərdir. 4 jurnalist də var ki, onlar dünyasını işləri başında dəyişmiş həmkarlarımızdır. Həm Şahin Ağabəylinin, həm Ceyhun Nağının, həm Rasim Əliyevin, həm də Rafiq Tağının ailələrini ev verməklə nisbətən toxdatmaq mümkündür. Qalır ədalət paylayanın insafına…

Evsiz jurnalistlərdən kim nə deyir?!

İndi isə adı çəkilən jurnalistlərin bəzilərinin yazdıqları çarpıcı şərhləri diqqətinizə təqdim etmək istəyirəm:

Tağı Türk: “Yataqxanada, siçovul qoxusunda iki qız uşağı ilə, mətbəxi, hamamı bir yerdə olan mənzildə yaşamaqdan bezmişəm…”

Anar Xanlarov: “Vüqar Səfərlinin qəbuluna gedib deyirəm ki, 12 ildir idman mediasında çalışıram, yayda-qışda, yağışda-qarda günümüz stadionlarda, idman zallarında, şəhər, rayon yollarında keçir, mənə deyir ki, sən normal jurnalist olsan, normal iş tapıb işləyərsən. O anda başa düşdüm ki, idman ölkəsində idman jurnalisti işləmək anormallıqdır.”

Ləman Ələşrəfqızı: “…o mənzil 57 yaşımın tamamında mənim olacaq”

“Mənim ikiotaqlı “xruşşovka” mənzilim var və o mənzil 57 yaşımın tamamında mənim olacaq. Bir ay pulunu ödəməsəm, küçədəyəm. 20-yə yaxın sənədli filmin müəllifi, əməkdar jurnalistəm. Baxıram ki, hamı özünü daha haqlı sayır. 21 il fəaliyyəti olan biz az qalırıq gözdən itək ki, 3 il stajlılar, cibkəsənlər, reketlər, nə bilim raketlər-paketlər ev alsınlar.”

Jurnalist ev almasa, Bill Qeytsə borc pul üçün müraciət edəcək

Müşfiq Abdulla: “Əgər övladı, nəvəsi üçün mənzil qamarlamaq üçün həyasızlıq edənlər qalib gəlsələr, mən dünya milyarderlərinə (məsələn, Bill Qeytsə) müraciət edib borc pul istəyəcəm. Qeyd edəcəm ki, borcumu ömrüm boyu işləyib qaytarmağa çalışacam. Əgər ömrüm yetməsə yerdə qalanın ödənilməsini ailəmə vəsiyyət edəcəm.”

Nəriman Tolışi: “Ev paylama tamamilə ədalətsiz bir kampaniyadır. Niyə yalnız Bakı və Sumqayıtda yaşayanlara şamil edilməlidir ki? Doğru olardı ki, ev istəyənlər müvafiq komissiyaya yazılı müraciət etsinlər. Komissiya bütün ev diləyənlərin ailə, yaşayış şəraitlərini öyrənəndən sonra, daha tez evə sahib olmağa ehtiyacı olanları evlə təmin etsin. Yaltaqların yəqin artıq evləri var.”

Lalə Mehralı: “Həyat yoldaşım Elçin Bayramlı ilə ikimiz də jurnalistik. Nə bir qarış torpağımız var, nə bir daxmamız. Evi olmayan, bizim kimi kirayələrdə çətin şəraitlərdə uşaq böyüdən, sözün həqiqi mənasında mübarizə aparan bütün jurnalistlərə ev verilsin. “Jurnalistə niyə ev verilməlidir?” deyənlərədir sözüm, siz jurnalistin çəkdiyi əziyyətləri çəkin, ondan sonra dilinizlə istəyəcəksiniz ki, ev verin. Ağır zehni əmək, 200-300 manat maaş, istirahət bilmədən, qələmlə özümüzə gor qaza-qaza mübarizə aparırıq biz. Sizin başınız ağrıyanda işdən icazə alıb evə gedə bilirsiniz, bizim başımız ağrıyanda o ağrı ilə oturub yazırıq, sabah siz oxuyasınız deyə. Sizin problemlərinizi yazırıq, onda yaxşı adam oluruq, evlə təmin olunanda pis? Siz jurnalistin ev almasında maraqlı olmalısınız, 100-200 nəfər səfalətdən qurtulur deyə sevinməlisiniz. Beyni məişət problemləri ilə dolu olan jurnalist yaza bilməz, məhsuldar olmaz. 12 ildir hansı şəraitlərdə uşaq böyütdüyümü desəm, o etiraz edənlər mat qalar. Mən pəncərələrə paltar tıxıram, sellofan çəkirəm ki, külək evə dolmasın, yağış yağanda evi su basır, damdan başımıza su yağır, uşağım revmatizma olub rütubətdən. Pulumuzun yetdiyi kirayə şəraitsizlik, rütubət, uçuq-sökük, mən bu imkansızlıqda iki övlad böyüdürəm, vətənə, millətə xeyri dəyən yazılar yazıram, öz uşağımıza ayıracağımız vaxtı ər-arvad ikimiz də kompüterin qabağında donqar vəziyyətdə keçiririk. Jurnalist pulu küçədən yığmır, iynə ilə gor qazmaq kimidir bizim pul qazanmağımız. Mənə ev verilməyib, heç bəlkə bu dəfə də verilmədi, bilmək olmaz. İgidi öldürün, haqqını verin.”

Allahı başının üzərində görməklə seçim aparmaq gərəkdir!

Elxan Şükürlü:

“Mənim adımı bu siyahıda görmək istəyən dostlara təşəkkür edirəm. Qaldı jurnalistlərə ev verilməsinin doğru və ya yanlış olması fikrinə, mən, istənilən halda dövlətin öz vətəndaşına sahib çıxmasının və peşəsindən asılı olmayaraq, hər kəsin də pulsuz mənzillə təmin edilməsinin tərəfdarıyam…
Hə, o başqa məsələ ki, hökumət jurnalistlərə niyə belə həssaslıqla yanaşır?!
Bu sorğuya yazılan şərhləri oxudum. Məncə, məsələnin gerçək mahiyyəti qalır bir kənarda, daha çox şəxsi və siyasi maraqlar çərçivəsindən mövzuya yanaşılır. Bir işə isə maraq qarışdısa, orada ədalət aradan qalxar…
Mən o qənaətlə razı deyiləm ki, dövlətin jurnalistlərə ev verməsi rüşvətdir, ələalmadır və yaxud azad medianın boğulmasıdır… Bu məntiqlə yanaşılsa, gərək, mənzillərin hamısı hökumət əleyhdarlarına, müxalif yazarlara paylansın… Halbuki bu halı müşahidə etmirik… Həm də biz bu yanaşma ilə ötən dəfə mənzil almış və yaxud da bu dəfə alacaq xeyli dəyərli jurnalistimizə bəri başdan bir yarlıq yapışdırırq ki, onların da qalxıb bu ittihamları irəli sürənlərə daha çox irad bildirmək haqları var…
Məncə, mənzillərin verilməsinə daha çox “xidmətin dəyərləndirilməsi” və strateji bir sahənin kənar təsirlərə düşməməsi üçün dövlətin “öz kontroluna” alma siyasəti kimi baxmaq lazımdır və bu da normal haldır. Necə ki hakimiyyəti söyənlərin xidməti onun əleyhinə olan xarici-daxili qüvvələr tərəfindən rəsmi və qeyri-rəsmi yollarla dəyərləndirilir, eyni məntiqlə bu siyasətə qarşı hakimiyyəti öyənlərin də mükafatlandırılması təbii qarşlanmalıdır…
Ancaq ortada böyük bir təbəqə də var ki, hər hansı cinahda yer almayıb: ipləri xaricin əlində deyil ki, hər cür təminat və zəmanət altında rahatca hakimiyyətin üzərinə gedə bilsinlər; ədalətsiz siyasət yürüdülməsinə görə hakimiyyəti də yerli-yersiz tərifləyənlər sırasında deyillər ki, hansısa imtiyaz sahibi olsunlar, mükafatlandırılsınlar… Öz dövlətini sevən və onun daha yaxşı olmasını istəyən, öz abrını-həyasını qoruyaraq çalışan, nəfsinə-tamahına yox deyə bilən, fəaliyyətində şantajdan, reketçilikdən, oğurluqdan uzaq duran xeyli qabiliyyətli jurnalistimiz var ki, dövlət, həqiqətən, onlara sahib çıxmalı, ən azından, ehtiyacdan gedib məcburən xarici təsirə düşməmələri üçün tədbirlər görməlidir. İndi jurnalistika dünyada ən güclü silah – Ordutək önəmli və hətta bir çox hallarda ondan da güclü strateji sahə sayılır. Bu silahdan kim düzgün yararlanarsa, o udar. İnformasiya savaşını ağılla aparan dövlət bir güllə atmadan ölkələr fəth edər, hakimiyyətlər qurar, hakimiyyətlər yıxar…
Əgər müharibə şəraitində olan Azərbaycanda jurnalistikanın bu əhəmiyyətini anlayıb ona belə diqqət yetirməyi gərəkli sayırlarsa, lap yaxşı, bunu pisləmək yox, təqdir etmək lazım…
Sadəcə, bu məsələdə ictimai diqqət və qınaq daha çox ona fokuslanmalıdır ki, mənzillər ədalətsiz yollarla bölüşdürülməsin, kimlərsə dövlətin bu gərəkli siyasətini şəxsi maraqlarının təmini vasitəsinə çevirməsinlər…
Əslində Azərbaycanda mənzilə haqqı, ehtiyacı və ölkəyə faydası ola biləcək jurnalistlərimizin sayı elə də çox deyil… Sadəcə, vicdanla və diqqətlə, qısası, Allahı başının üzərində görməklə seçim aparmaq gərəkdir!”

Zöhrə Məmmədova: “Keçən dəfə ev alanlara bax, gör kirayədə qalan idilər, yoxsa evi olanlar? 25 ildir qaçqınlıq şəraitində yaşayırıq. Ata-ana, bacı-qardaşı itirdik… Qaçqının elə bir şəraiti var ki, kirayədə qalsan ondan yaxşıdır. Bir-birinizin ayağını tapdalamayın. Çünki evi sizlərə verirlər. Bizim əziyyət əziyyət deyil. Mətbuatda 25 ildir işləyirəm. Ayda bir dəfə yazısı gedən jurnalistdir? Baxın görün ətrafınıza…”

Əvəz Zeynallı

Vüqar Süleymanov Şəkinin Bolludərə kəndinin subsidiya ala bilməyən 261 sakinindən biridir.

Bolludərə kənd sakinlərinin əsas məşğuliyyəti əkinçilikdir.

Kənd Təsərrüfatı Nazirliyinə istinadən keçən il Bolludərə kəndinin 280 sakininə 754 112 manat subsidiya ayrılıb.

Bu il isə icarəyə götürdükləri torpaqlara subsidiyaların verilməsi üçün onlardan əlavə sənəd tələb edilib.

Çəkiliş zamanı 5 kənd sakini Şəki rayon icra hakimi Elxan Usubovla görüşüb. İcra hakimi onların icarəyə götürdüyü torpaqların holdinqə verildiyini deyib.

Holdinqin adı isə hələ də naməlumdur.

Toplum Tv

Çərşənbə axşamı, 20 İyun 2017 00:00

“Korrupsiya ona görə təhlükəlidir ki...”

Yazan

Cavid Cabbarlı: “Korrupsiyanın təhsil, ordu və səhiyyədə qabarıq müşahidə olunması daha təhlükəlidir

 “Ölkə korrupsiya bataqlığında çabalayır. Dövlətin ən ciddi postlarında açıq şəkildə korrupsiya hallarına rast gəlinir. Heç bir məmur bu kimi hallardan ehtiyyatlanmır. Hesab edirəm ki, korrupsiya dövləti içindən dağıdan amildir”. Bu sözlər Vətəndaş və İnkişaf Partiyasının sədr müavini Cavid Cabbarlıya məxsusdur.

C. Cabbarlının sözlərinə görə, dünyada ideal dövlət və cəmiyyət yoxdur, istənilən halda az və ya çox problem tapmaq mümkündür: “Biz bilirik ki, heç bir dövlət ideal deyil. Nisbilik nəzəriyyəsinə əsasən dövlətlər və cəmiyyətlər qiymətləndirilir. İnkişaf eləmiş ölkələrdə insan hüquq və azadlıqları, eyni zamanda sosial yaşayış səviyyəsi ölçü vahidi kimi dəyərləndirilir. Fərdə verilən önəm cəmiyyətin inkişaf mərhələsini və yaxud geriliyini təyin edir. Demokratik dünyanın ölçü vahidi kimi əsas götürdüyü prinsipləri zəiflədən amillərdən biri, bəlkə də birincisi korrupsiyadır. Korrupsiya ona görə təhlükəlidir ki, fərdlərin hüquq və azadlıqlarını məhdudlaşdırır. Korrupsiya dünyanı mehvərində saxlayan ədalət konsepsiyasına zidd olduğu üçün təhlükəlidir. Korrupsiya ümumilikdə insan yaranışının fəlsəfəsinə uyğun gəlmədiyi üçün təhlükəlidir. Nəticədə korrupsiya hansı cəmiyyətdə varsa, mütləq o cəmiyyət məhvə məhkumdur. Düşünürəm ki, hakimiyyətin bütövlükdə korrupsiya halına bulaşması və bu halın təhsil, ordu, səhiyyə sahəsində qabarıq müşahidə olunması daha təhlükəlidir. Ondan da təhlükəlisi cəmiyyətin susqunluğudur. Hakimiyyətin yürütdüyü yanlış siyasət nəticəsində cəmiyyətdə susqunluq yaranıb. Rəsmi dairələrin korrupsiya halına bulaşması və cəmiyyətin susqunluğu ölkənin yaxın zamanlarda ciddi böhrana girəcəyindən xəbər verir. Böhran deyəndə dövlət müstəqilliyinin sual altına düşməsini və ölkənin parçalanaraq bölüşdürülməsini nəzərdə tuturam”.

Müsahibimiz ölkədə tüğyan edən yoxsulluqdan da söz açıb: “Hər il yoxsulluğun səviyyəsi qalxır. Hökumət bu barədə fərqli və həqiqəti əks etdirməyən hesabatlar yayımlayır. Ölkədə tüğyan edən yoxsulluğu ört-basdır etmək istəyir. Lakin həqiqəti gizlətmək mümkün deyil. İnsanların yaşayış səviyyəsi, ölkədən kütləvi axın və digər arzuolunmaz hadisələr göz qabağındadır. Yoxsulluq həddini bilmək üçün intiharların sayına baxmaq kifayətdir. Hər gün intihar hadisəsi eşidirik. Ölkədə qeydə alınan intiharların böyük əksəriyyəti sosial problemlərlə bağlıdır. Bu sahədə mütəxəssislər həyəcan siqnalı çalırlar. Digər tərəfdən boşanma hallarının artmasını deyə bilərik. Minlərlə gənc sevərək ailə qururlar bir müddət sonra boşanırlar. Axı sevgi üzərində qurulan ailə niyə dağılmalıdır? Gənc ailə başçısı evinə, sevdiyi həyat yoldaşına və yaxud sevgidən doğulmuş körpəsinə çörək apara bilmirsə, ailəsinin ən kiçik ehtiyaclarını ödəyə bilmirsə, biz necə deyə bilərik ölkədə yoxsulluğun səviyyəsi aşağı düşüb? Sosial çətinliklərə tab gətirə bilməyən gənc ailələr ya intihar yolunu seçirlər, ya da boşanmanı. Hər altı aydan bir aidiyyatı qurumlar guya minlərlə iş yerinin açıldığı barədə hesabat verirlər. Amma kim hansı işlə təmin olunubsa, deyilmir. Kiçik araşdırma aparsaq, əksini görərik. Hər ay minlərlə işçi ixtisar adı ilə işsiz qalır. Ölkədə nə qədər özəl iş yeri var? Bunu bilmək üçün fəaliyyət göstərən yerli və xarici şirkətlərin sayına baxsaq hər şey anlaşılar. Barmaq sayı qədər şirkət fəaliyyət göstərir. Onlar da mütləq hansısa oliqarx məmurun himayəsində. Xarici şirkətlər də 2014-cü ildən başlayaraq ölkəni tərk edirlər. Elə mətbuat səhifələrində rast gəlirik ki, hər iki gündən bir hansısa xarici şirkət ölkəni tərk edir. Bu qədər açıq faktlar olduğu halda yoxsulluğu necə gizlədə bilərik?”

Hökumət ya başını itirib, nə etdiyini bilmir, ya da bilərəkdən dövləti çökdürməyə çalışır. Hər iki hal ölkəni yaxın zamanlarda təhlükəli və qurtulması mümkün olmayan böhrana sala bilər. Dünya təcrübəsinə görə böhranla üzləşən cəmiyyətlərdə qiymətlər endirilir və vergilər azaldılır. Bu ona görə edilir ki, əhalinin sosial vəziyyəti sabit qalsın. Çünki əhalinin sosial vəziyyəti gərginləşəndə cəmiyyətdə partlayış ehtimalı artır. Son beş ildə müqayisə aparsaq görərik ki, nəqliyyat sahəsini istisna etməklə bütün sahələr üzrə azı 3 dəfə bahalaşma olub. Əslində normal iqtisadi qaydalara görə bahalaşma qaçılmazdır. Lakin bahalaşma maaş və təqaüd artımı ilə paralel olmalıdır. 100-200 manat maaş olan ölkədə, 50-150 manat həcmində təqaüd verilən cəmiyyətdə bahalıq partlayışla mütləq nəticələnəcək. Son 10 ildə təqaüdçiyə verilən müavinət 10 manat həcmində artıq. Bu da ümumi hesablamaya görə 12-15 faiz deməkdir. Lakin hər gün istifadə olunan məsələn qəndin bir kiloqramı 0,80 manatdan 2 manata qədər bahalaşıb. Bu isə 60 faiz bahalaşma deməkdir. Bu kimi faktlar sadalamaqla bitmir. Hesab edirəm ki, qeyd etdiyimiz problemlərin kökündə siyasi idarəçilik dayanır. Siyasi idarəçilik bərbad olduqca ölkə daha da çirkaba yuvarlanır - C.Cabbarlı bildirib.

Çərşənbə axşamı, 20 İyun 2017 00:00

Astanada Suriya üzrə növbəti görüş olacaq

Yazan

Suriyada vəziyyətin nizamlanmasna dair növbəti görüş Astanada iyulun 4-5-də keçiriləcək

Trend-in məlumatına görə, bu barədə Qazaxıstan XİN-in mətbuat xidmətinin rəhbəri Anuar Jaynakov bildirib.

A.Jaynakov deyib ki, görüşün həmin tarixdə keçirilməsi barədə həm Rusiya, həm Türkiyə, həm də İran tərəfinin razılığı alınıb.

Qazaxıstan XİN mətbuat xidməti rəhbərinin sözlərinə görə, Astana danışıqlarının budəfəki mərhələsində əldə olunmuş əvvəlki razılaşmaların necə yerinə yetirilməsi və vəziyyətin normallaşdırılması istiqamətində atılacaq növbəti addımlar müzakirə ediləcək.

Paytaxtın Nizami rayonunda yaşayan vətəndaş Bəhruz Sadiqi 2 il əvvəl bankdan kredit götürüb. Lakin ödənişdə gecikmələr olduğu üçün bank tərəfindən məhkəməyə verilib.

Xeber.İnfo-nun xezerxeber.az-a istinadən məlumatına görə, Bəhruz Sadiqi də icra məmuru ilə danışaraq deyilən məbləği ödəyəcəyini bildirib. Lakin bank kollektor agentliklərdən birinə müraciət edərək, Bəhruz Sadiqidən kredit borcunu almasını istəyib. “Bakı Kollektor Agentliyi”nin əməkdaşları da bu gün səhər razılığa gəlmək üçün onu ofisə dəvət ediblər. Bəhruzun sözlərinə görə, telefonda mülayim danışsalar da, ofisə çatdıqdan sonra ona müxtəlif təzyiqlər göstərməyə başlayıblar. Hətta mobil telefonunu əlindən alaraq bir neçə saat girov da saxlayıblar. Günorta isə ona başqa bir telefon veriblər ki, zəng vurub pul istəsin.

Yalnız polis əraziyə gəldikdən və borcu ödəyəcəyinə dair ərizə yazdırdıqdan sonra agentliyin əməkdaşları Bəhruz Sadiqini buraxıblar.

Jurnalistlər “Bakı Kollektor Agentliyi”nin də mövqeyini öyrənməyə çalışsalar da, onlar çəkilişə maneə olublar.  Ərazi üzrə Nəsimi rayonu 19-cu polis bölməsindən isə bildirilib ki, Bəhruz Sadiqi və yoldaşları bölməyə dəvət ediliblər, araşdırma aparılır.

Bazar ertəsi, 19 İyun 2017 00:00

Tağı Əhmədova yeni vəzifə verildi

Yazan

Yeni Azərbaycan Partiyası (YAP) Yasamal rayon təşkilatının sədri, Bakı Metropoliteninin sabiq rəisi “Əməkdar mühəndis”, Texnika elmləri namizədi, “Şöhrət” ordenli Tağı Əhmədov...

Göründüyü kimi, onu təqdim edərkən müxtəlif titullardan istifadə etmək mümkündür. Həyatının 44 ilini Bakı metropolitenində çalışmış,  16 ilə qədərini bu qurumun rəisi işləmiş Tağı Əhmədovu artıq fərqli formada da təqdim etmək mümkün olacaq. 

Modern.az saytının məlumatına görə, Bakı Metropoliteninin sabiq rəisi Tağı Əhmədov həm müəllim, həm də kafedra müdiridir.

Tağı Əhmədov Azərbaycan Memarlıq və İnşaat Universitetində dərs deməklə yanaşı, buradakı Nəqliyyat fakültəsində “Nəqliyyat tikintisi və  Yol hərəkətinin təşkili” kafedrasının müdiridir.

Universitetin mətbuat katibi Nəcibə Mirzəyeva Modern.az saytına bildirib ki, sabiq rəis artıq 20 ilə yaxındır, universitetdə müəllim kimi fəaliyyət göstərir. Lakin  bir ildən az müddətdir ki, kafedra müdiri vəzifəsinə təyin edilib. Amma indiyədək geniş ictimaiyyət bu haqda məlumatlı olmayıb.

Qeyd edək ki, Tağı Əhmədov 1997-ci ildən Azərbaycan Memarlıq və İnşaat Universitetinin aspirantıdır. 

“Fəxri Dəmiryolçu”, “Bakı meropoliteni veteranı” döş nişanları, “Şöhrət” ordeni və “Azərbaycan Resbulikasının Əməkdar mühəndisi” fəxri adı və nişanı ilə təltif edilib. 2005-ci ildən Beynəlxalq Nəqliyyat Akademiyasının həqiqi üzvüdür. Bakı Metropolitenini dünya standartlarına çatdırılması sahəsində xidmətlərə görə “Qızıl Buta” müstəqil milli mükafatına layiq görülüb. 

2012-ci ildə ölkənin iqtisadi inkişafında xidmətlərinə və Azərbaycan elminə verdiyi töhfələrə görə akademik Yusif Məmmədəliyev adına medalla təltif olunub. 

Bazar ertəsi, 19 İyun 2017 00:00

Avropa Məhkəməsi Azərbaycana vaxt verdi

Yazan

"Hökumətə iyulun 16-dək vaxt verilib"

Avropa İnsan Hüquqları Məhkəməsi jurnalist Əfqan Muxtarlının oğurlanması işi ilə bağlı kommunikasiyaya başlayıb. İyunun 8-də bununla bağlı Azərbaycan hökumətinə sorğu göndərib.

Məlumatı vəkil Elçin Sadıqov "Turan”a verib. 

Bildirib ki, qarşıya qoyulan suallara cavab vermək üçün iyulun 16-dək hakimiyyətə vaxt verilmişdi. AİHM tərəfindən işə bu cür operativ baxılması bu işin prioritet olması ilə izah edilir: 

"Çünki söhbət adam oğurluğundan gedir. İstintaq Ə.Muxtarlının tibbi ekspertizası barədə məsələni yubadır. Belə ki, hələ mayın 30-da ekspertiza ilə bağlı vəsatət qaldırılıb, ancaq onun hələ bu gün - iyunun 19-da keçirilməsi gözlənilir”, - vəkil qeyd edib.

Müdafiə tərəfi bunu jurnalistin saxlanması zamanı ona işgəncə verilməsi faktının gizlədilməsi cəhdi kimi qiymətləndirib.

Jurnalist Əfqan Muxtarlı isə mayın 29-u yaşadığı Gürcüstandan zorla Azərbaycana gətirildiyini deyir. 

Deməsinə görə, Tbilisidə saxlanarkən ona işgəncə verilib, zorla sərhədə gətirilərək Azərbaycan tərəfinə təhvil verilib. Üstəlik, jurnalist bildirirdi ki, sərhəddə cibinə 10 min avro qoyulub.

Ə.Muxtarlı Cinayət Məcəlləsinin 315.2-ci maddəsi ilə hakimiyyət nümayəndəsinə müqavimət və ya zor tətbiq etmədə ittiham olunur. Bundan başqa, ona 318.1, 206.1 maddələri ilə - sərhədi qanunsuz keçmə və qaçaqmalçılığa görə də ittiham irəli sürülüb.

Rəsmi qurumların bildirməsinə görə, o, Azərbaycan ərazisində tutulub. Üstəlik, saxlanarkən hüquq-mühafizə orqanları əməkdaşlarına zorakı müqavimət göstərib.

Məhkəmənin qərarı ilə Ə.Muxtarlıya ilkin istintaq dövründə 3 aylıq həbs cəzası verilib.

Gerçək həyatdan alınmış bir sevgi dastanı əsasında Səyyarə xanım və Ferens List romanı yazılmaqdadır

Xeber.İnfo-nun verdiyi məlumata görə, ədəbi həllinin yeni mərhələsində olan `Səyyarə və Ferens List` əsəri barədə Radiokafedə ictimai məlumatlandırma və müzakirə keçirilmiş, müəllif Mehriban Vəzir çoxsaylı suallara cavab vermişdir.

Məlum olduğu kimi Azərbaycan, Gürcüstan və Almaniyanın təşəbbüsü ilə YUNESKO 2017-ci ildə Cənubi Qafqazda alman məskənlərinin salınmasının 200 illik yubileyini qeyd edir. Bu əlamətdar tarixi hadisənin Azərbaycanda da yüksək səviyyədə keçirilməsi və tarixi yaddaşın bərpa edilməsi üçün bəzi işlər görülməkdədir.

Yazıçı Mehriban Vəzirin `Səyyarə xanım və Ferens List` romanı məhz bu tarixi dönəmə təsadüf etmişdir.

Yazılması və nəşri Prezident yanında QHT-lərə dəstək Şurası tətəfindən maliyyələşən bu əsər Azərbaycan Qadınlarının Siyasi Mədəniyyət Mərkəzi İctimai Birliyi tərəfindən icra edilir. Layihə çərçivəsində öz bədii həllini tapan bu hadisə məhəbbət əfsanəsi olaraq tarixdən keçmiş, lakin izləri bu günə kimi gəlib çıxmışdır. Rus imperiyası tərəfindən almanların xristianlığın və rus dilinin cənub sərhədlərinə kimi yayılması məqsədi ilə Cənubi Qafqaza köçürülməsi tarixşünaslarımız tərəfindən müəyyən ölçüdə araşdırılmış, monoqrafiyalar yazılmış, kitablar çap edilmişdir. Lakin bu maraqlı tarix heç zaman bədii təqdimat olaraq ictimaiyyətə çatdırlmamışdır. Proses yalnız rəsmi sənədlər əsasında təqdim edilmiş, insan amili, sosial vəziyyət, şəxslərin hekayələri, yarımçıq talelər diqqətə alınmamışdır.

Çox mühüm bir hadisə, böyük macar bəstəkarı Ferens Listin musiqi maarifçiliyi missiyası ilə Avropa və Rusiyaya səyahətləri çərçivəsində Gəncəbasara – Helenendorfa səfəri də gözdən qaçmış, tarixin qaranlığında qayb olmuşdur. Lakin... doğrudan da əlyazmaları yanmırmış.

Bir təsadüf bu hadisənin üzərindəki sirr pərdəsini qaldırmışdır.

Məlum olmuşdur ki, böyük bəstəkar Helenendora konsert verməyə gəlmiş, Alabaşlı kəndində bir bəyin qonağı olmuş, hətta onun gözəl qızı Səyyarı xanıma aşiq olmuşdur.

Mehriban Vəzir hazırda bu barədə roman yazmaqdadır.

Eləcə də, Azərbaycan insanı almanların yerləşdirildiyi torpaqların Gəncə xanlığının süqutundan sonra Cavad xanın rus imperiyası tərəfindən müsadirə edilmiş otlaqları olduğu barədə məlumatlı deyil. Bu otlaqların Xanlıq adlanması da yalnız tarixin arxivlərində və yaddaşlarda qalır. Cavad xanın torpaqlarında almanlar üçün Helenendorf adlanan qəsəbənin salınması, sovet dövründə bu qəsəbənin Xanlar, indi də Göygöl adlanması məlumdur. Lakin bu yerin haqq etdiyi ad Xanlıqdır.

Roman eləcə də Səyyarə xanım və Ferens Listin böyek sevgisi fonunda almanların Gəncəbasara yerləşdirilməsi, uzun illər orada məskunlaşmaları, təsərrüfat işləri və mədəni proseslərdəki fəaliyyətləri, yerli əhali ilə ünsiyyətləri və əlaqələrindən, həm də dövrun yasaqları, talelərə və insa həyatlarına vurduğu zərbələrdən bəhs edəcək.

Mehriban Vəzir `Səyyarə xanım və Ferens List əsəri ilə imperiya siyasətinin insanlara gətirdiyi bəlalardan, taleləri qıran, sevənləri ayıran siyasətlərdən bəhs etmək, eləcə də tarixin qaranlıq nöqtələrini işıqlandırmaq iddiasındadır.

ələrini işıqlandırmaq iddiasındadır.

Dini Komitə İlqar İbrahimoğluna xəbərdarlıq etdi: "Qanunsuz əməllərini davam etdirərsə..."

Dini Qurumlarla iş üzrə Dövlət Komitəsi İlqar İbrahimoğlunun İçərişəhər “Cümə” məscidi dini icmasının adından tədbir keçirməsi ilə bağlı məsələyə münasibət bildirib.

Komitənin Bakı şəhəri üzrə şöbəsinin müdiri Anar Kazımov bildirib ki, iyunun 18-də bəzi kütləvi informasiya vasitələrində İlqar İbrahimoğlu adlı şəxsin Ramazan ayının 3-cü Əhya gecəsi ilə bağlı İçərişəhər “Cümə” məscidi dini icmasının adından istifadə edərək tədbir keçirməsi haqqında məlumat yayılıb.

“Qeyd etmək istərdim ki, İlqar İbrahimoğlunun İçərişəhər “Cümə” məscidi və orada fəaliyyət göstərən dini icma ilə hər hansı hüquqi bağlılığı yoxdur. Hazırda rəsmi dövlət qeydiyyatından keçmiş İçərişəhər “Cümə” məscidi dini icmasının sədri və axundu Qafqaz Müsəlmanları İdarəsinin səlahiyyətli nümayəndəsi Surxay Məmmədovdur. İlqar İbrahimoğlunun İçərişəhər “Cümə” məscidi dini icmasının adından sui-istifadə edərək tədbir keçirməsi, bunu mətbuatda işıqlandırması yolverilməzdir, qanunvericiliyə zidd xarakter daşıyır. İlqar İbrahimoğlu bu kimi qeyri-qanuni hərəkətlərini davam etdirərsə, hüquqi məsuliyyət daşıyacaq və Dövlət Komitəsi tərəfindən bununla bağlı hüquqi müstəvidə bütün zəruri addımlar atılacaq” - deyə, o əlavə edib.

Komitə dindar vətəndaşları məscidlərdən kənar, qeyri-qanuni şəkildə təşkil edilmiş tədbirlərə qatılmamağa çağırır.

“Jurnalist Əfqan Muxtarlının başqa ölkədə həbs edib Azərbaycana gətirilməsi siyasi hakimiyyətin güc nümayiş etdirməsidir. Hakimiyyət bütün rəqiblərini və onu tənqid edən istənilən yazarın harda olmasından asılı olmayaraq həbs edə biləcəyini nümayiş etdirir. Hətta beynəlxalq hüququ nəzərə almır”. Bu sözlər Müsavat Partiyasının mühacirətdə olan üzvü Şəhriyar Şəmsəddinova məxsusdur.

Ş. Şəmsəddinov hesab edir ki, hakimiyyətin bu addımından sonra xüsusən jurnalistlərn təhlükəsizliyi sual altına düşür: “Gürcüstan dövləti son illərdə demokratik dəyərləri əldə etmişdi. Gürcüstanın demokratik yolla irəliləməsinə əyani sübut kimi Avropa Birliyi ölkələrinə vizasız gediş-gəlişinin təmin edilməsini göstərə bilirdik. Lakin bu hadisədən sonra bəzi çətinliklər yarana bilər. Hər halda bu məsələlər dünya ictimaiyyətinin, xüsusən Avrop Birliyinə daxil olan ölkələrin müzakirə edəcəyik mövzudur. Hesab edirəm ki, Azərbaycan hakimiyyəti Gürcüstandakı əlaltıları vasitəsi ilə nisbətən demokratik hesab etdiyimiz dövlətdə insan oğorluğunu həyata keçirə bilib. Bu hadisədən sonra istənilən ölkədən istədiyi adamı gətirə biləcəyi ehtimalı yaranır”.

 Müsahibimiz hesab edir ki, Ə.Muxtarlı hakimiyyəti və hakim ailənin fantastik rəqəmlərlə ölçülər varidata sahib olmasını tənqid etdiyinə görə həbs edilib: “Ə.Muxtarlı jurnalist fəaliyyəti dövründə həmişə hakimiyyəti tənqid edib, onun dünyanın müxtəlif ölkələrində milyonlarla ölçülən mülklərə sahiblənməsini araşdırıb. Hakim ailənin qanunsuz və zor yolu ilə əldə etdiyi varidatdan yazan jurnalistlərin böyük əksəriyyəti ya həbs olunub, ya da ciddi təzyiq və təqiblərə məruz qalıb. Bu, o deməkdir ki, hakimiyyət ölkəni şəxsi əmlakı və obyekti hesab edir. Vətəndaşını çox ağır sosial duruma salan, ölkənin gələcəyini ciddi təhlükə ilə üz-üzə qoyan hakimiyyət işgəncə və həbs yolu ilə cəmiyyətdə qorxu yaratmaq istəyir. Bununla da hakimiyyətinin ömrünü uzatmağa çalışır. Hesab edirəm ki, Ə.Muxtarlının həbsi Azərbaycanın beynəlxalq imicinə ciddi ziyan vuracaq və hakimiyyətin qeyri-səmimi davranışını ifşa edəcək”.

8 -dən səhifə 149