"Rayonda olan bütün texnika Paşayevlərin əkin sahələrinə yönləndirilib”
İyunun 30-da, axşam saat 8 radələrində Ağsu rayonunun Növcü, Çiyni kənd sakinləri taxıl biçini üçün texnika tapa bilmədiklərinə görə Ağsu-Kürdəmir yolunu bağlayaraq etiraz aksiyası keçiriblər. Aksiya iştirakçılarının Meydan TV-yə verdiyi məlumata görə, Ağsu Rayon Polis Şöbəsinin əməkdaşları etiraz aksiyasını zorakılıqla dağıdıblar.
"Ağsu Rayon Polis Şöbəsinin rəisi Fəxrəddin Abbasovun özü aksiya iştirakçılarını döyərək xəsarət yetirdi. 10-dan çox aksiya iştirakçısı həbs edilib” – deyə adının açıqlanmasını istəməyən aksiyaçılar deyib. Onların sözlərinə görə, rayon ərazisində böyük əkin sahələri ölkənin hakim ailəsi tərəfindən alınıb: "Paşayevlər (vitse-prezident Mehriban Əliyevanın ailəsi nəzərdə tutulur - red) Ağsu rayonunda böyük əkin sahələrini sakinlərin alindən alıblar. Buna görə də rayonda olan bütün texnika Paşayevlərin əkin sahələrinə yönləndirilib. Nəticədə kəndlilərin taxılı sahədə məhv olur”.
Ağsu Rayon Polis Şöbəsindən saxlanılanlarla bağlı məlumat vermək istəməyiblər: "DİN-lə əlaqə saxlayın, bizdə məlumat yoxdur”.

Nəzakət Məmmədova: “Xəbərdarlıq Ankaraya qarşı artan basqıların növbəti nümunəsidir”

ABŞ Dövlət Departamenti növbəti dəfə öz vətəndaşlarına Türkiyəyə səfər etməməyi tövsiyə edib. Bu barədə ABŞ Dövlət Departamentinin bəyanatında bildirilir.

Qeyd edək ki, ABŞ vətəndaşlarına xəbərdarlıq bundan əvvəl də, yanvarın 10-da edilmişdi. Lakin budəfəki xəbərdarlıqda yeni səbəblər yer alıb: “Terror və qanunsuz saxlanılmalar təhlükəsi olduğundan Türkiyəyə səfər etməməyi tövsiyə edirik”. Departament ABŞ vətəndaşlarına xüsusən Türkiyə-Suriya sərhədinə və ölkənin 15 cənub-şərq əyalətlərinə səfər etməməyi məsləhət görüb. Tövsiyəyə baxmayaraq Türkiyəyə səfər edənlər əcnəbilərin daha çox olduğu yerlərdən, aksiyalar keçirilən ərazilərdən uzaq olmağa, təhlükəsizlik tədbirlərinin yüksək səviyyədə təşkil olunduğu otellərə üstünlük verməyə çağırılıb.

Türkiyədəki növbədənkənar prezident və parlament seçkilərindən sonra belə bir çağırışın edilməsi maraq doğurur. Təhlükəsizlik üzrə ekspert Nəzakət Məmmədova bildirdi ki, Departamentin bu xəbərdarlığı seçkilərdən sonra Türkiyəyə qarşı aparılan kampaniyanın növbəti təzahürüdür: “Seçki ərəfəsində və seçkilərdən dərhal sonra Türkiyəyə qarşı artıq gördüyümüz kimi təzyiqlər daha da güclənib. Bir neçə gün əvvəl ABŞ Türkiyənin Rusiyadan S-400 alacağı təqdirdə ona qarşı sanksiyalar tətbiq edə biləcəyini açıqlamışdı. Ardından isə bu xəbərdarlıq Türkiyəyə qarşı artan davamlı basqıların daha bir nümunəsidir. ABŞ Ərdoğanın qələbəsindən narahatdır və bunu qəbul etmədiyini bu cür bəyanatlarla sübut edir. Ərdoğanın yenidən seçilməsi, üstəlik, bu dəfə daha da güclənmiş və bütün səlahiyyətləri əlində cəmləşdirmiş halda hakimiyyətdə qalması Qərbi narahat edir. Bu, ABŞ və Yaxın Şərqdəki müttəfiqlərinin, eləcə də bəzi Avropa ölkələrinin ”Daha Böyük Orta Şərq" şərti adı verilən, əslində isə “Soyuq müharibə”dən sonra Yeni Dünya nizamı qurmaq planlarının məhv olması deməkdir. Ərdoğanın hakimiyyətdə qalması Orta Şərqin olduqca əhəmiyyətli ölkəsi olan Türkiyənin bu plana mane olaraq müqavimət göstərməsinə səbəb olacaq. ABŞ, İngiltərə, Fransa 100 il əvvəl də yeni dünya düzənini məhz Osmanlını parçalayaraq həyata keçirmişdi. Sayks-Piko, Sevr müqavilələri ilə buna nail olmağa çalışmışdı. Bu gün də Türkiyəni parçalayaraq növbəti yüzillikdə Yeni dünya nizamı formalaşdırmaq istəyirlər. Ərdoğan isə region ölkələri arasında, elə dünyada da buna mane olan ən böyük liderlərdən biridir. Təbii ki, Putinin də bu işdə haqqı tanınmalıdır. ABŞ bu cür xəbərdarlıqları bir qayda olaraq o zaman edir ki, o ölkə Birləşmiş Ştatların mənafeyinə deyil, öz milli maraqlarına uyğun olan addımlar atsın. Bu zaman o ölkənin beynəlxalq nüfuzunu müəyyən qədər azaltmaq, guya dövlətin əcnəbilərin təhlükəsizliklərini lazımı dərəcədə təmin etmək iqtidarında olmadığını sübut etmək üçün, turist qəbul edərək büdcəsini artırmaq və s. qarşısını almaq üçün bu cür bəyanatlar verilir. Lakin ən əsas məqsəd siyasi təzyiq vasitəsidir".

N.Məmmədova onu da vurğuladı ki, Azərbaycanın özü də dəfələrlə ABŞ Dövlət Departamentinin bu cür xəbərdarlıqlarına məruz qalıb: “Ölkəmiz ABŞ mənafeyinə zidd beynəlxalq enerji, kommunikasiya layihələri həyata keçirən dövrlərdə yüksək riskli ölkələr sırasına aid edilib. Halbuki vətəndaş iğtişaşlarının baş verdiyi, dövlət çevrilişlərinin, dövlət orqanlarına silahlı basqınların olduğu qonşu Gürcüstan və Ermənistan daha az riskli ölkələr sırasına aid edilib. Azərbaycan nəinki Cənubi Qafqazda, postsovet məkanında, hətta dünyada ən sabit, əmin-amanlığın hökm sürdüyü ölkələrdən biridir. Ölkəmizin də, hazırda Türkiyənin olduğu kimi bu cür xəbərdarlıqla üzləşməsi siyasi məqsəd daşıyır. Bu xəbərdarlığın heç bir əsası yoxdur. Türkiyədə hazırda fövqəladə vəziyyət rejimi hökm sürür, əməliyyat şəraiti hüquq-mühafizə orqanlarının tam nəzarəti altındadır. Ölkədə baş tutan seçkilər tam demokratik, əmin-amanlıq şəraitində keçib, müxalifət seçkilərin nəticəsini tanıyıb, narazılıq, iğtişaş olmayıb. Belə olan halda bu xəbərdarlığın mənası nədir? Bir məqamı da unutmayaq ki, bəzən ABŞ belə xəbərdarlıqlar etdikdən sonra elə olub ki, Türkiyədə terror aktları baş verib. Burada iki ehtimal var ya ABŞ kəşfiyyatı terror barədə məlumatlı olub, lakin bu barədə Türkiyə tərəfini xəbərdar etməyib - baxmayaraq ki, iki ölkə arasında həm ikitərəfli əməkdaşlıq, həm də NATO çərçivəsində terrorçuluğa qarşı mübarizə sahəsində qarşılıqlı məlumat mübadiləsi barədə razılaşmalar var. Terror təhdidi varsa, ölkələr mütləq bir birini xəbərdar etməlidir. Necə ki, Türkiyə Avropa ölkələrini terror barədə xəbərdar etdi və doğurdan da Fransa və Belçikada terror aktları törədildi, yaxud ABŞ Rusiyanı Sankt-Peterburqda planlaşdırılan terakt barədə əvvəlcədən xəbərdar etdi. Sual olunur ki, ABŞ Dövlət Departamenti nəyə əsasən Türkiyədə terror xəbərdarlığı edib? Əgər əlində tutarlı faktlar varsa, bu məlumatı Türkiyəyə ötürübmü? Doğrudur, PKK seçkilərdən öncə, Türkiyə ordusu Kandildə hərbi əməliyyatlar başlayan dövrdə Türkiyəni terrorla hədələyib. Türkiyə hər an terrora məruz qala biləcək ölkədir. Lakin artıq uzun müddətdir ki, ölkədə terror baş vermir. Doğrudur, ABŞ səfirliyi bundan əvvəl də dəfələrlə öz vətəndaşlarına Türkiyəyə getməmək xəbərdarlığı edib, eyni zamanda ola bilsin ki, Türkiyədəki səfirliyinə və konsulluğuna məxfi direktiv göndərərək Türkiyədəki Amerika şirkətlərinə, habelə oradakı vətəndaşlarına zərurət olmadığı hallarda xüsusən bayram günlərində insanların sıx toplaşdığı yerlərdən, əyləncə məkanlarından uzaq durmağı tövsiyə edib. Adətən belə hallarda hökumət binaları, ictimai binalar, hərbi obyektlər, xarici səfirliklər, xarici şirkətlər, banklar, ibadət və turizm yerləri daha çox hədəf obyekti ola bilər. ABŞ səfirliyinə Vaşinqtondan göndərilən, Dövlət Departamenti və Mərkəzi Kəşfiyyat İdarəsinin məxfi qrifli direktivlərində yəqin ki, bunlar hamısı detallı şəkildə göstərilir. ABŞ elə bir dövlətdir ki, onun istənilən bəyanatı məqsədindən asılı olmayaraq gözardı edilə bilməz. Bu baxımdan yəqin ki, heç şübhəsiz Türkiyə də bunu diqqətə alacaqdır. Üstəlik də hər tərəfdən atəş çənbərində olduğu bir dövrdə ABŞ xəbərdar etdi-etmədi, Türkiyə daima terrora qarşı aldığı tədbirləri ən yüksək səviyyəyə çıxaracaqdır. Türkiyədə əvvəlki illərdə adətən turizm mövsümündə teraktlar çox olub deyə ABŞ bununla əsaslandıra bilər. Lakin son dövrlərdə teraktların sayı azalıb. Ona görə də bu xəbərdarlıq daha çox seçki ilə əlaqəli görünür”.(musavat.com)

''Prokuror Yusif İldırımzadənin qardaşı Rasim 21 min manat pulumuzu alıb qaytarmır. Deyir Ramil Usubova bağlı adamlarıq. Ramil Usubovdan xahiş edirəm pulumun qaytarılmasına gömək etsin. Əgər Ramil Usubov səsimi eşitməsə, prezidentin yanına qalxacam'. Bu sözləri Criminal.az saytına açıqlamasında 76 yaşlı şəhid anası Sütun Əhmədova deyib.
''Mənə dedi ki, sən bilmirsən biz kimi, kimin qohumuyuq?''
S.Əhmədova bildirib ki, yaxın qohumu öz oğlunu yol polisinə işə düzəlmək istəyirdi. Qohumluq münasibəti olan Rasim İldırımzadə bu məsələni həll etməyi öz üzərinə götürüb. Qohum olduğuna görə inanıb və R.İldırımzadəyə işə düzəltmək üçün 21 min manat verib. 
''Bu il yanvarda pulu Rasimə qohum-əqrabamızın yanında verdim. Rasim də söz verdi ki, narahat olmağa dəyməz, polisin rəhbərliyi ilə yaxın qohumluğu var. Pulu verəndən sonra isə uşağın işə düzəlməsi alınmadı. Rasimdən pulu geri istəyəndə isə hər dəfə bir söz deyirdi. Gah dedi ki, pulu prokuror qardaşı Yusifə verib. Başqa bir danışığında isə dedi ki, bank müdiri olan qardaşı Yunis İldırımzadə pulu sayır, get götür. Amma 7 aydır nə pul geri qaytarılır, nə də uşağın işi düzəlir. Son dəfə isə telefon danışığında mənə dedi ki, sən bilmirsən biz kimik, kimin qohumuyuq?'' - deyə S.Əhmədova belə deyir. 
R.İldırımzadə: ''Atamın canı o qadın yalan danışır...''
Rasim İldırımzadə 
Məsələ ilə bağlı Rasim İldırımzadə Criminal.az saytına açıqlamasında bildirdi ki, Sütun xanımla qohumluğu var və baş verənlər anlaşılmazlıqdır. Onun sözlərinə görə, belə işlərlə əlaqəmiz ola bilməz: ''Yəqin pulu kiməsə verib və ya biz kimdənsə xahiş etmişik. O qadın atamın canı yalan danışır. O qadınla təmasda olmamışam. Onun həyat yoldaşının biz tərəfdə Zaur adlı qohumu var. Onlar zəng etmişdilər. Nə isə... Görüşüb ətraflı danışarıq...''.
Məlumat üçün bildirək ki, R.İldırımzadə Bakının Xətai rayonunun prokuroru Yusif İldırımzadənin qardaşıdır. Y.İldırımzadə daxili işlər naziri Ramil Usubovla qudadır. Digər qardaşı Yunis İldırımzadə ''Əmrahbank''ın rəhbəridir.  
Prokuror Yusif İldırımzadə
R.İldırımzadə özü isə polis polkovnikidir. Əvvəllər Daxili İşlər Nazirliyi Hava Nəqliyyatında Polis İdarəsinin rəis müavini olub. Bir neçə il əvvəl isə fəaliyyəti dayandırılmış Azərbaycan Beynəlxalq Universitetinin (ABU) sabiq rektoru Elşad Abdullayev onunla bağlı gizli çəkilmiş video paylaşmışdı. Sabiq rektor görüntülərdə R.İldırımzadə ilə aralarında olan söhbəti yaymaqla yanaşı mətbuatda müraciət yaymışdı ki, R.İldırımzadə MTN zabiti Mahir Abdullayevin oğurlanmasının arxasında prezidentin Mühafizə Xidmətinin rəisi Bəylər Əyyubovun dayandığını bildirib. Lakin R.İldırımzadə mətbuata açıqlama verərək həmin videonun montaj olduğunu demişdi.
Şənbə, 30 İyun 2018 00:00

Gəncə polisindən şikayət var

Yazan

Sakin: ''Bütün günü parkları, çayxanaları dolaşırlar, vətəndaşlara ''ilişirlər''

"Üç gün əvvəl bir içkili kişini adamların gözü qarşısında maşına oturdub döydülər. Sərxoş olub, şüşəni sındırıb, ona görə döydülər. Polisə sual verirəm; vətəndaşı niyə döyürsən? İçkilidir, şüşə qırıb, lap elə deyək ki, ətrafdakıları narahat edib, apar, qanunla cəzası nədir – cərimə... Ver məhkəməyə, cərimələnsin, iş bitsin. O, şüşə qırmışdı, böyük cinayəti yox idi, ancaq siz birləşib onu döyməklə cinayət elədiz”.

Bunu Meydan TV-yə Gəncə sakini Eyvaz Məmmədov deyir. Onun sözlərinə görə, bir neçə gündür ki, üç polis əməkdaşı şəhərin mərkəzində gəzərək sakinləri hədələyir, ictimai asayişi qorumaq əvəzinə insanları təzyiq altında saxlayır.

"Qarşılarına çıxanı hədələyirlər"

"Küçədə it gəzdirəni, qoşa dayanıb söhbət edəni, mağazanı gec bağlayanı – qarşılarına kim çıxdı, hədələyirlər, təzyiq göstərirlər”- Eyvaz Məmmədov deyir.

İtdən söz düşmüşkən, elə şəhər sakini Kamil Qasımov polis tərəfindən itə görə "qulaqburması” alıb. Deyir, iki gün əvvəl Heydər Əliyev prospektində ona məxsus mağazanın qarşısında həmin polis işçiləri onu da hədələyiblər.

"Sahə müvəkkili deyir: hamı bezib"

"Zahiri görünüşcə də yekəpər polislərdir. Biz onları buralarda əvvəllər görməmişdik. Mənim ev itim var. Hər gün özümlə gəzdirirəm, gəlib mağazanın qarşısında hədələdilər ki, sabahdan burda itlə görünmə. Halbuki, körpə itdir. Qanunda ev itini çölə çxarmamaq kimi qadağa yoxdur. Deyirlər, ev itidir, evdə saxla, çölə çıxartma. Bilmirlər vətəndaşa necə ilişsinlər, necə incitsinlər... Bir az danışanda da, idarəyə aparacaqları ilə hədələyirlər. Bütün günü parkları, çayxanaları gəzib dolaşırlar, parkda skamyada oturana da ilişirlər ki, niyə burda oturmusan.. Hamıya göz ağardırlar, hədə-qorxu gəlirlər. Bu yolla insanlara psixoloji təzyiq göstərirlər. Gedib sahə müvəkkilinə şikayətlənmişəm, deyir, hamını bezdiriblər, hamı şikayətçidir, ancaq mənlik deyil, baş idarənin polisləridir, gedin rəisə şikayət edin”- Kamil Qasımov deyir.

Gəncə şəhər polis idarəsindən bildirilib ki, şikayətlər cəfəngiyyatdır. Gün ərzində idarənin post-partul xidməti növbəli qaydada şəhərdə ictimai asayişin qorunmasını həyata keçirir: "İdarəyə belə bir şikayət daxil olmayıb. Sizə şikayət edən niyə bir dəfə də olsun idarəyə şikayət etmir? Polis asayişi qoruyur, vətəndaşı qoruyur. Polis adam döymür. Deyilənlərin heç bir əsası yoxdur”.

Həə… bu gün sevgililər günüdü!

Çox gecdi mənim üçün. Həm sevgililər günündən yazmaq, həm də sevgidən yazmaq. Pərviz Cəbrayıl demişkən, mən kimdən yazdımsa, özümü yazdım – tükənmirəm də, yenə də yazıram, yenə də ayrılarından yazıram və yenə də AYDIN alınır yazdıqlarımdan.

Əslində, ilin bütün günlərində yazsam da, maraqlısı odur ki, deyəsən, 30 iyunda nəsə yazmamışam, yadıma gəlmir! İllah da ki, dostum, qardaşım Süleyman Dəmirəl…, bağışlayın, Əvəz Zeynallı bu günü Sevgililər günü kimi təqvimə pərçim edəndən. Hətta nəinki dəstək vermişəm, lap belə düşməncəsinə əleyhinə çıxmışam. Yazıq Əvəz! Ən böyük dəstəyi məndən almalıykən…

…Bir dəfə “Geopolitika XXI əsr” qəzetində yazı da yazdım. Əliməmməd Nuriyevin yadından çıxmayıbsa, zəng edib təbrikmi, təşəkkürmü etmişdi o möhtəşəm yazıya görə: mən Zərifə Əliyevanın nəşinin Azərbaycana gətirilməsi gününü SEVGİ GÜNÜ kimi təklif etmişdim – faktlara və məntiqə söykənərək!

Mən anlamımızda Valentin gününü – 14 fevralı sevgililər günü kimi qeyd etməyə meylli olmuşam. Bir dəfə də, Vahid Coşqun şahiddi, “Nizami” metrosunun yaxınlığındakı kafedə yüngülvari qeyd edirdik. Ofisiant xanımı da dəm havasına sevgililər günü münasibətiylə qutlamaq istəyəndə, xanımın çıldırması əbədi yadımda qaldı, hətta bir az kin-nifrət də püskürdü! Lap belə həqarət də vardı! Onda Əvəzlə küsülü vaxtlarım idi. Küsülü olmasaydım, anında zəng edib o qızla danışdırardım və təslim olduğumu etiraf edərdim!

Və o məclisdə yeyib-içmək burnumdan gəldi! Day heç vaxt sevgililər günü barədə düşünmədim.

Sonra Əvəzlə barışdım.

Sonra mən tutuldum Əvəzin işçisi kimi!

Sonra Əvəz tutuldu mənim müdafiəçim və baş redaktorum kimi.

Sonra biz çıxdıq!

Sonra mən yenə də yeknəsəq həyatıma davam etməyə başladım, özüm özümü xoşbəxt edəcək nələrisə etmədim, yalnız yazmaqdan zövq aldım! Mənə dostlarım, övladlarım, valideynlərim Allahımın lütfüylə ən yaxşı şeyləri yaşatdılar, amma mən yenə də xoşbəxt olmağın dadını bilmədim!

Maraqlı olanı odur ki, həyatda da, sosial şəbəkədə də məni Əvəzin yanında görənlər dost oldular! Ən maraqlı dostlarım kimlər oldu, deyimmi?

Əvəz Zeynallının Sevgililər Gününün fanatları – onların içində ərli qadın da var, evli kişi də.

Dünyanın düz vaxtlarında, dostluğumuza və həmkarlığımıza görə, Əvəzə bir sevgililər günü yazısı boyun olmuşdum. O ərəfələrdə boşanmışdım. Zarafata salıb deyirdim ki, elə sevgililər günündə evlənəcəm, sizinlə birlikdə qeyd edəcəm və bu olacaq ən böyük töhfə.

Alınmadı! Elə həyatım adına el arasında “məişət pozğunluğu” kimi təsnifləşdirilən “təkərə” düşüb fırlandı!

Zatən də mən ailə adamı deyiləm. Yana-yana yazdığım anamı bəlkə də ildə bir dəfə görürəm! Həyatımdakı qadın yanımda ola-ola, gündə əlli beş dəfə zəng edirəmsə, anama ayda bir dəfə zəng edib beş dəqiqə necəsən soruşmuram!

Dədəmi vəsf edə-edə hamını kövrəltsəm də, onunla da eləcə! Bəhanəm var: ağır eşidir!

Lap elə nəvəm olsun! Şəklini paylaşmağıma baxmayın, hələ də kişilik edib, bilet pulu düzəldib gedib onu görməmişəm. Artıq yeriyir, əməlli-başlı danışır!

Qadın, ailə dünyasından yekə-yekə yazmağım da həmçinin!

Yəni deməyim o ki… mən YAZa bilirəm, YAŞAya yox!

Həəə… dedim axı gecdi. Ancaq bir borc məsələsi var – düzdü, mən dostlarımın, yaxınlarımın, üstümdə haqqı-sayı olanların borclarını da heç qaytara bilən deyiləm, amma yazı borcuna gücüm çatır.

Beləliklə…

Zaman elə zibil zamandı, siyasi-ictimai, sosial-iqtisadi, ədəbi-bədii, day nə bilim, idman, hərbi vətənpərvərlik konuları çox yorucu görünür: çünki bu konularda Azərbaycan insanının dəyərsizliyi adamın gözünə girir, hələ təhdidlər, həbslərlə müşayiət olunan etirazlar! Dəhşətə baxın ki, siyasi diktatorluğa və iqtisadi monoplistliyə görə rejimə etiraz bir yana, bu anlaşılandı, hətta futbolçuya etiraza görə bu ölkədə jurnalist öldürülüb!!! Ədəbiyyat adamı türməyə salınıb!

Adamları başa düşmək lazımdı. Və onlara… dəstək olmaq lazımdı! Və onlara… siyasi sığınacağın ən gözəl məkanını – ailəni qorumağı anlatmaq və yardımçı olmaq lazımdı!

…Keçən il bu vaxtı depressiyadaydım. Dəqiqəbaşı “öldürərəm özümü, yaşamaq əzabdı, hər şey fəlakət” serenadası yapırdım fb-də. Əlim yazıya yatmırdı, yazdıqlarımda da, cavan dostlarımdan biri demişkən, sətirlər arasında Bryüs Li qanı su yerinə axıdırdı!

Və…

Tanıdığım və tanımadığım, dost olduğum və olmadığım insanlar ruhən, mənən dəstək oldular! Şərhlərdə, mesajlarda insanlığın ətri mənə ən ağır psixotrop dərmanlardan da faydalı oldu!

Bu gün o insanlara minnətdarlıq edirəm!

Bu gün SEVGİ GÜNÜDÜ!

Və… mütləq və mütləq bu günü əbədiləşdirmək lazımdı, ilboyu buna köklənmək lazımdı!

Çünki insanları hər şeydən məhrum edib, hər şeyi gözdən salıblar! Yalnız sevgi qalıb! Sevgi hissi – nütfəsində mərhəmət, rəğbət, bağlılıq qalan ali, ümumbəşəri bir yaşantı!

Aqressiya bu hissin yeganə qənimidir!

Və… bu gün üçün boyun olduğum yazını yazıya başlayıram, bu yazını oxumağınız üçün zəruri izahata son qoyaraq!

Gülmirə…

“… Bərq vuran dəhliz, yazı masasının üstünə sərilmiş ağappaq “skatert”, səliqəyə salınmış, süpürülüb-silinmiş ev, əvvəllər varlığını belə unamadığı güzgülərdə inikas olunan işıq zərrələrinin rəqsi, yeri dəyişdirilmiş divanın yeni dizaynı, par-parıldayan əlüzyuyan və unitaz, səliqəsindən bayılan mətbəx, sıraya düzülən qab-qaşıq, hamamdan və mətbəxdən asılan tər-təmiz dəsmallar, tərtəmiz stəkanlarda çay və… (…) yadına düşdü ki, bu evdə bir ildən bir az çox yaşamışdı. Bu evin üzü gülməmişdi heç vaxt. Kirlənə-kirlənə, iylənə-iylənə günlər keçmişdi. Bu evdə yemək-içmək olmuşdu. Bu evdə çox şey olmuşdu. İndi ona çatırdı bu evdə hər şeyi yerbəyer etməyə, qorumağa, əgər sevgiydisə sevgini, ev idisə evi, həyat idisə həyatı yaşamaq istəyini qorumağa lazım olan əl olmamışdı! Nəinki bu evdə, ümumiyyətlə ömründə heç vaxt olmamışdı!”

Və yenə də Gülmirə…

Bəzən heyrət edirsən: qadın minbir əziyyətlə, amma ürəyinin yağıyla, ruhunun sevgisiylə bişirdiyi yeməyi qabağına çəkir, süfrəni hazırlayır oturur və… yemir! Sənin yeməyinə baxıb… doyur!

Bir daha Gülmirə…

Stefan Sveyq deyirdi ki, vicdan min şahidə bərabərdir! Hə, vicdanı olan adamlarda belə bir fikir yarana bilər: İlahi, mən bu qadının sevgisinə layiq deyiləm, bu qadının mənə görə çəkdiyi əzabların, göstərdiyi qayğının qarşılığını necə və nə cür qaytarım?

Hər yerdə, hər zaman… Gülmirə!

Öz canının ağrısını deməz, hərçənd ki, hər bir qadının ağrıyan yerini göstərə bildiyi bir kişi olmalıdı, amma baxışından, yerişindən, nəfəs almağından, cavab verməyindən, səsinin tonundan bilər haran ağrıyır, nədən narahatsan, kim xətrinə dəyib, yeməkmi istəyirsən, çaymı içərsən!

Və… dünyanın faciəsinə bax ki: belə qadının qorxusu… itirmək olar!

Çünki Azərbaycanlı kişisinə inam… Xocalı faciəsindən sonra ölüb!

Çünki… Azərbaycanlı qadını ictimai-siyasi həyatda səsi(nin kişiliyi) gəlməyən, səsinin kişiliyi türmələrə salınan cəmiyyətdə hər şeyə münasibət bildirməklə hərşeyşünas olanların əhatəsində özünü təhlükədə hiss edir!

Onun sevdiyi kişisini ya hökümət alar əlindən, ya da… qadınlar!

Zəifləşməsələr də, zəif salınan kişiləri BELƏ və BELƏ sevməyi bacaran qadının qorxusunu anlamaq özü də dəhşətdi!

Bu dəhşətin çarəsi SEVGİ GÜNÜDÜ!

Qadınlaınızı hər 30 iyun gününə diri və sağlam çatdırın!

Bunun üçün isə, ilk növbədə, xanımlarınızı sevgili kimi sevin. Azərbaycan kişisinin sağalmaz xəstəliyi var: arvadına “can” deyəndə elə bilir, dədəsi-nənəsi əldən gedir, sevgilisini “həyatım, aşkım” çağıranda ölüləri xoşbəxt olur!

Azərbaycan qadınlarının bir zülmü də var: onlar gözəl bilirlər onları haçan “evdəki” – qulluqçu, uşaqların anası, haçan “çöldəki” – sevgili kimi sevirlər!

“Evdəki”ləri “çöldəki” qədər xoşbəxt etməyi bacarmaq lazımdı!

Gününüz, günümüz mübarək!

YAZIYA SÖZARDI: Yazıboyu bəzi mətləbləri anlatdım və təkliflər verdim. Birinci də özüm əməl edirəm: xanımlarınıza hər zaman qayğı və diqqəti əsirgəmədiyinizi açıq-aşkar – evdə, telefonla danışanda, sosil şəbəkələrdə nümayiş etdirməkdən çəkinməyin! Ayıb deyil və saymayın da!

Ayıb odur ki… biz bunu etməyəndə, qadın bu diqqətə və sevgiyə ehtiyac hiss etmiş olacaq və… içində qırıla-qırıla qalacaq!

Mən öz payıma etiraf edirəm: Gülmirə məni noutbuka qısqanır! Çünki mənim üzümdə təbəssümü daha çox özüylə danışıqda yox, mən burda yazı oxuyanda və yaxud da şərh yazanda görür! Onçun da günahımı yudum və yazdım: “Gülü, səni çox sevirəm! Məni qısqanma!”

Baş prokurorun keçmiş birinci müavini, Sosial Ədalət Partiyasının sədri Mətləb Mütəllimli Sumqayıtın icra başçısı Zakir Fərəcovun əməlləri haqda silsilə yazılarla çıxış edir.


AzEuroNews.com partiya sədrinin üçüncü diqqət çəkən məqaləsini təqdim edir. Yazıda ölüm işlərindən bəhs olunur:

► Binəqədi məmurları polisə aparılıb

“Əvvəldən qeyd etdiyimiz kimi, havadarları, çoxlu sayda torpaqlar, mülklər bağışladığı iqtidar sahiblərinin dəstəyi ilə Zakir Fərəcovun törətdiyi əməllərin, özbaşınalıqların sayı hesabı yoxdur.

Bu özbaşınalıqlar o həddə çatmışdır ki, nəinki özünün ağalıq etdiyi ərazilərdə, hətta , rəhbərlik etdiyi inzibati əraziyə daxil olmayan rayonlarda da hökmranlıq edir, cəzalar tətbiq edir.

Bir müddət öncə onun Novxanı ilə Sumqayıt arasında törətdiyi qoçuluq da çoxlarının yadından çıxmayıb.

Azərbaycanın vahid inzibati ərazi xəritəsinə uyğun olaraq bu iki məntəqə arasında, dənizkənarı hissədə Binəqədi rayonuna aid müəyyən sahə də mövcuddur.

Buna baxmayaraq, Novxanı ilə Sumqayıt ərazisinin dənizkənarı hissəsinin yanındakı çimərlik ərazisini tam ələ keçirmək məqsədi ilə Z.Fərəcov burada “ Sumqayıt “ yazılan guşə yaratmış , bununla da Binəqədi rayon ərazisini faktiki zəbt etmişdir.

Buna imkan vermək istəməyən Binəqədi icra hakimiyyətinin sabiq rəhbərliyi “Sumqayıt” yazılan lövhəni oradan çıxarmış, özünün qanuni ərazisini bərpa etmək istəmişdir. Sizcə, Z.Fərəcov buna necə reaksiya vermişdir?

Çox sadə, onun tapşırığı ilə hadisə yerində olan Binəqədi icra hakimiyyəti başçısının müavini, işçilər zorla maşına basılaraq Sumqayıt şəhər polis idarəsinə aparılmış, bir müddət orada həbs edilmişlər.

Başqa bir misal. Z.Fərəcov Binə bələdiyyə sədri (əslində, bu ərazi Sabunçu rayonunun ərazisidir) Babaxana qarşı iddia irəli sürmüş, pul istəmiş, o da verməmiş, hətta, Z.Fərəcovu təhqir etmişdir.

Buna cavab olaraq Z.Fərəcov müxtəlif bəhanələrlə onu şərlərək tutdurmuş və o hal-hazırda da zindandadır. Nə isə, yenə keçək ölüm hadisələrinə:

► Daha bir ölüm…

Əvvəllər, yəni, sovetlər dönəmində komsomolun birinci katibi olmuş, sonra isə Qobu qoyunçuluq sovxozunun direktoru işləmiş Balağa adlı şəxs də Z.Fərəcovun qəzəbinə tuş gəlmişdir.

Tələb edilən pulu vermək istəməyən Balağa şərlənərək həbs edilmiş, uzun müddət cəzaçəkmə müəssisəsində cəza çəkmiş, çıxdıqdan bir az sonra isə dünyasını dəyişmişdir.

► Fərəcova sui-qəsd

3 avqust 2007-ci ildə Milli Təhlükəsizlik Nazirliyinin ictimai əlaqələr mərkəzindən AZƏRTAC-a belə bir məlumat daxil olmuşdur ki, dövlət xadiminin xidməti fəaliyyətinə son qoymaq məqsədi ilə sui-qəsd etməyə cəhd, yəni, terror aktı törətmək istəyən Arif Aslanov və Məmmədhəsən Ağayev Azərbaycan Resğublikası Cinayət Məcəlləsinin 277-ci maddəsi ilə təqsirli bilinərək həbs edilmişlər.

İstintaq müəyyən etmişdir ki, Arif Aslanov Dövlət Texniki İnventarlaşdırma və Mülkiyyət Hüquqlarının Qeydiyyat İdarəsinin rayonlararası texniki inventarlaşdırma və mülkiyyət hüquqlarının qeydiyyatı idarəsinin rəisi vəzifəsində işləmişdir.

Sumqayıt şəhər İcra Hakimiyyətinin başçısı Zakir Fərəcov
Sumqayıt şəhər İcra Hakimiyyətinin başçısı Zakir Fərəcov
Fəaliyyəti zamanı xidməti işləri ilə əlaqədar Abşeron rayon icra hakimiyyətinin başçısı Z.Fərəcovla aralarında ciddi narazılıqlar yaranmışdır.

İstintağın yazdığına əsasən, 2005-ci ilin noyabr ayının sonları- dekabr ayının əvvəllərində Z. Fərəcova sui-qəsd etmək qərarına gələn A.Aslanov tanışı M.Ağayevə bu barədə sifariş etmiş və 60 min ABŞ dolları vəd edərək avans kimi 40 min ABŞ dolları vermişdir.

Müəyyən hazırlıq işləri görən M.Ağayev əlavə daha 40 min ABŞ dolları tələb etmişdir. A.Aslanovun əlavə məbləğdə pul verməkdən imtina etməsi səbəbindən Z.Fərəcova qarşı terror aktı baş tutmamışdır.

Bəri başdan qeyd edim ki, şəxsiyyət əleyhinə törədilən qəsdləri, terror aktlarını birmənalı olaraq qətiyyətlə pisləyirəm və berə hərəkətlərə görə qanunla nəzərdə tutulmuş sərt tədbirlərin tərəfdaram.

Bununla belə, bu cür hallarda qisasçılığın da ən sərt formada tətbiq edilməsini doğru hesab etmirəm. Bəli, indiki halda, xoşbəxtlikdən, faciə baş verməmiş, terror həyata keçirilməmişdir.

Ona görə də, belə halda ən sərt cəza növləri seçilməsi cəzanın humanizm prinsiplərinnə uyğun gəlmir və adekvat deyildir.

Təəssüf ki, bir çox hallarda olduğu kimi,bu hadisədə də humanizm prinsipləri arxa plana atılmış, keçmiş milli təhlükəsizlik nazirliyinin rəhbərliyi öz qəddarlığını bütün gücü ilə nümayiş etdirmişdir.

Bu quldur dəstənin rəhbərliyi ilə Z.Fərəcovun əlaqələri ən yüksək səviyyədə olduğundan istintaq tərəfi ona müsbət münasibətini bir daha nümayiş etdirmişdir.

Məhz dağıdılmış nazirliyin rəhbəri , hüdudsuz cinayətlər törətmiş, bu gün də məsuliyyətdən kənarda qalmış E.Mahmudovun tapşırığı ilə A.Aslanova heç bir güzəşt edilməmiş, əksinə , əlavə maddələr də yükləməklə ona 11 il 3 ay azadlıqdan məhrum etmə cəzası verilmişdir.

Bu zaman onun ilk dəfə cinayət törətməyə cəhd etməsi, ailə vəziyyəti, eləcə də xəstəliyi nəzərə alınmamış, ömürlük gedər gəlməzə göndərilmişdir.

Çox keçmir, A.Aslanovun bir sıra xəstəlikləri, xüsusən də böyrək çatışmazlığı şiddətlənir, lakin, müalicəsinə lazımı şərait yaradılmır.

Vəziyyəti getdikcə ağırlaşdığından və müalicə müəssisəsində lazımı şərait olmadığından A.Aslanov həftədə 3 dəfə dializ olunmaq üçün Mərkəzi Neftçilər Xəstəxanasına aparılır.

Vəkillərin çoxsaylı yazılı və şifahi müraciətlərinə baxmayaraq cəzaçəkmə müəssisəsinin rəhbərliyinin və məhkəmənin birbaşa fəaliyyətsizliyi nəticəsində məhkumun vəziyyəti getdikcə ağırlaşmaqda davam edir.

Məhkəmə humanizm prinsiplərini rəhbər tutaraq belə ağır xəstəni dərhal azad etək əvəzinə, süni surətdə vaxtı uzadır ki, bunun da nəticəsində iş Avropa Məhkəəsinə qədər gedib çıxaraq icraata götürülür .Lakin…

A.Aslanovun səhhəti ağır olduğu halda, məhkəmə onun barəsində qanunsuz olaraq həbs qətimkan tədbiri seçir, faktiki onu işgəncəyə məruz qoyur , bununla da göz görə-grə ölümə məhkum edir.

Sözsüz ki, belə qəddar münasibətdə tifaqı dağıdılmış nazirlik rəhbərliyinin də xofu az rol oynamır. Beləliklə də vaxtında zəruri tibbi yardım ala bilməyən A.Aslanov çox keçmir ki, xəstəxanada dünyasını dəyişir.

► Daha bir ölümə qəsd…

Bu gün tam toxunulmaz hesab edilən Z.Fərəcovun saysız hesabsız qanunsuz əməllərindən birini də Bayram Şərifovla bağlıdır.

Xırdalan şəhərinin 3 nömrəli Mənzil İstismar İdarəsinin rəisi olmuş Bayram Şərifov torpaq alınması məqsədi ilə vətəndaşlardan 200 min manat pul alaraq aidiyyatı ünvana çatdırır.

Müəyyən müddət keçsə də torpaq məsələsi həllini tapmır. Belə olduqda B.Şərifov bir neçə dəfə Z.Fərəcovun qəbulunda olur, məsələnin həll olunmasına cəhd edir.

Sonradan dəfələrlə cəhd etsə də, başçı ilə görüşə nail ola bilmir. Növbəti dəfə də başçı ilə görüşməyinə imkan verilmədikdə , o, əlacsız qalıb İcra hakimiyyətinin inzibati binasi ilə üzbəüz tərəfə keçərək özünə “ Vinçester “dən atəş açır, qarın nahiyyəsindən ağır yaralanır.

Tam sağalmasa da, borcluların əlindən baş götürüb Almaniyaya qaçır. Xırdalan parkının içərisində vaxtilə B.Şərifova məxsus olan kafe də artıq sökülmüş, yerində müasir tipli 3 mərtəbəli kafe tikilmişdir ki, bu obyektin də kimə qazanc gətirdiyi aydındır.

►►► Saray bələdiyyəsinin sədri niyə öldürüldü?

(Ardı var )

CIF bazisi üzrə İtaliyanın Augusta limanı şərtləri ilə Azərbaycanın yüngül neftinin qiyməti iyunun 27-də 78,95 dollar/barel təşkil edib ki, bu da çərşənbə axşamına olan göstəricidən 2,7 dollar dollar/barel çoxdur. Bu barədə Trend-ə ölkənin neft-qaz bazarındakı mənbə bildirib.

FOB bazisi üzrə Türkiyənin Ceyhan limanında Azərbaycanın yüngül neftinin qiyməti iyunun 27-də 78,32 dollar/barel təşkil edib ki, bu da əvvəlki qiymətdən 2,71 dollar/barel çoxdur.

Novorossiysk limanından yüklənən URALS neftinin qiyməti iyunun 27-də 74,96 dollar/barel təşkil edib ki, bu da Trend-ə görə, əvvəlki qiymətdən 2,71 dollar/barel çoxdur.

Şimal dənizindən hasil edilən "Brent Dated" etalon növlü neftin qiyməti isə iyunun 27-də 76,27 dollar/barel təşkil edib. Bu, əvvəlki qiymətdən 2,59 dollar/barel çoxdur .

Ağsu Rayon İcra Hakimiyyətinin başçısı Ənvər Seyidəliyevin oğlu 1 milyon manat dəyərində obyekt alıb.

İcra başçısının oğlu Dəyanət Seyidəliyev paytaxtın Binəqədi rayonu, Əcəmi Naxçıvani küçəsindəki “Bellezza” gözəllik mərkəzini istifadəyə verib.

Bundan əlavə icra başçısının oğlunun yeni yaşayış binasının 1 və 2-ci mərtəbələrini əhatə edən gözəllik mərkəzinin təmirinə və oradakı avadanlıqlara yüz min manatlarla vəsait xərclədiyi bildirilir.

Qeyd edək ki, D. Seyidəliyev Azərbaycan Həmkarlar İttifaqları Konfederasiyasında sədrin müşaviri vəzifəsində çalışır.

“F124 Sachsen” alman freqatında ABŞ istehsalı olan “SM-2” zenit raketi buraxıcı qurğunu tərk edə bilməyərək, işə salma seksiyasında ilişib qalıb və gəmidə yanğına səbəb olub.

Hadisənin görüntüsü “Defense Daily” “YouTube” kanalında yayılıb.

İnsident nəticəsində iki dənizçi yaralanıb. Xoşbəxtlikdən “SM-2” zenit raketinin döyüş başlığı partlamayıb. Əks təqdirdə daha ağır fəsadlara yol aça bilərdi.

Dənizçilər yanğını operativ şəkildə söndürə bilib.

İnsident Almaniyanın hava hücumlarından müdafiə sistemlərinin Norveç sahillərində aparılan sınaqları zamanı qeydə alınıb.

"AtraBank”ın İdarə Heyətinin sədri Elmixan Nəbiyevin məhkəməsi yekunlaşır

2016-cı ilin yanvarında Mərkəzi Bank "AtraBank”-ın lisenziyasını ləğv edəndən az sonra onun rəhbəri də həbs olundu. 

Bankın İdarə Heyətinin sədri Elmixan Nəbiyev aylardır ki, Bakı Ağır Cinayətlər Məhkəməsində mühakimə olunur. Hakim Fikrət Qəribovun sədrliyilə keçirilən məhkəmə prosesi başa çatmaq üzrədir. 

İyunun 27-də dövlət ittihamçısı çıxış edərək Elmixan Nəbiyevin 10 il azadlıqdan məhrum edilməsini istəyib. Prokuror bildirib ki, keçmiş bank rəhbərinə qarşı irəli sürülmüş ittihamlar məhkəmə istintaqı zamanı sübuta yetirilib.

Elmixan Nəbiyev Cinayət Məcəlləsinin 179 (mənimsəmə və ya israfetmə) və 308-ci (vəzifə səlahiyyətlərindən sui-istifadə etmə) maddələri ilə ittiham olunur.

Sabiq bank rəhbəri ilə bağlı istintaq Baş prokuror yanında Korrupsiyaya qarşı Mübarizəİdarəsində aparılıb. İttihamda yazılıb ki, Elmixan Nəbiyev qanunvericiliyin şərtlərini pozub, bankın lisenziyasının ləğv olunmasının qarşısını almaq üçün formal, heç bir fəaliyyəti olmayan özəl müəssisələr yaradıb. Həmin müəssisələr onun özünün və dost-tanışının adına olub.

Sözügedən müəssisələrin adına 8 milyon 405 min manat qanunsuz kreditlər rəsmiləşdirilib. Eyni zamanda, fiziki şəxslərin adlarına da ümumilikdə 809 min manat kredit rəsmiləşdirilərək mənimsənilib.

Elmixan Nəbiyev məhkəmədə ifadə verərkən özünü təqsirli bilmədiyini deyib. Bankın səhmlərinin 99.3 faizinə sahib olan Elmixan Nəbiyev bildirib ki, fəaliyyət göstərdiyi 23 il ərzində qanunu pozmayıb. Kimsənin bir manatını da mənimsəmədiyini deyən sabiq bankirin sözlərinə görə, özünün şəxsi avtomobili də yoxdur.

Məhkəmədə "Qaradağ Maşınqayırma Zavodu" ASC-nin direktoru Asif Bədəlov, tikinti materiallarının alqı-satqısıyla məşğul olan şirkətin rəhbəri Ağamirzə Arazov, Polad" MTK-nın rəhbəri Faiq Bədəlov və başqaları şahid qismində dindirilib. Onlar başqa şəxslər üçün adlarına kredit götürülməsindən danışıblar. Bildiriblər ki, həmin şəxslərin bank rəhbərliyilə yaxşı münasibətləri vardı.

"Dostum Əkbər Məmmədovun xahişi ilə bankdan adıma 390 min dollardan çox kredit götürdüm. Sonra krediti zavodun adına sənədləşdirdik. Pulu bankdan götürüb ona verdim, krediti də özü ödəməliydi", - şahid Asif Bədəlov bildirib.

Şahid Faiq Bədəlov isə Əkbər Məmmədov üçün 255 min dollar kredit götürüb:

"Şirkətin adına bankda 1 milyon dollarlıq xətt açılmışdı. Həmin xətlə də bankdan 255 min dollar kredit verildi. Krediti də Əkbər müəllimin özü ödəyirdi".

Şahid Ağamirzə Arazov isə deyir ki, iş yoldaşı Rəşad Gərayzadənin xahişi ilə "AtraBank”dan onun adına 1 milyon dollar kredit götürüb: "Həmin pulu götürüb, elə kassaya da verdim. Yalnız sənədlərə qol çəkmişəm, 1 milyon dolları isə görməmişəm. Mən həmin zaman Elmixan müəllimlə müqavilə bağladım ki, ödəniş Rəşadın bankda adına olan depozit hesabından çıxılsın".

Hakim Əkbər Məmmədov üçün kredit götürən şahidlərin nəzərinə çatdırıb ki, o adam özü də məhkəmədə dindirilib. Bildirib ki, o, kredit ödəməyib.(meydan.tv)

4 -dən səhifə 187